ՁԵՐԲԱԿԱԼՈՒԵԼ ԵՆ ԱԺ ՊԱՏԳԱՄԱՒՈՐ ՅԱԿՈԲ ՅԱԿՈԲԵԱՆԻ ԵՂԲԱՅՐՆ
ՈՒ ԵՂԲՈՐՈՐԴԻՆ
06-07-2007 17:10:00 | Հայաստան | Հասարակութիւն
ԵՐԵՎԱՆ, 6 ՅՈՒԼԻՍԻ, ՆՈՅԵԱՆ ՏԱՊԱՆ: Յունիսի 29-ի կէսգիշերին ՀՀ
ոստիկանութեան աշխատակիցները, պայթեցնելով ԱԺ պատգամաւոր Յակոբ
Յակոբեանի (Լեդի Յակոբ) եղբոր եւ եղբորորդու տների դարպասները ներս
են խուժել նրանց տներ եւ ձերբակալել Հ.Յակոբեանի եղբորը` Սիմոն
Յակոբեանին եւ վերջինիս կրտսեր որդուն` Վարդան Յակոբեանին:
Ս.Յակոբեանի մեծ որդուն` Ստեփան Յակոբեանին, յաջողուել է փախչել:
Ոստիկանները յայտնաբերել են մեծ քանակությամբ զինամթերք:
Ինչպէս տեղեկացնում է «Հայկական ժամանակ» օրաթերթը,
Ս.Յակոբեանին ոստիկանութիւնում պահել են 2-3 օր, իսկ Վ.Յակոբեանը
դեռեւս ձերբակալուած է:
Ըստ «Հայկական ժամանակ»-ի, յիշեալ գործողութեան հրահանգը
«իջեցուել է ամենավերեւներից». ՀՀ նախագահ Ռոբերտ Քոչարեանը եւ
վարչապետ Սերժ Սարգսեանը իրաւապահներին հրահանգել են արագ
բացայայտել 2006թ. յունիսի 22-ին տեղի ունեցած, ՀՀԿ հանգուցեալ
անդամ, նախկին պատգամաւոր Վահան Զատիկեանի որդու` Սեդրակ Զատիկեանի
սպանութիւնը, որի հետ ենթադրւում է, որ կապուած է Հ.Յակոբեանի
շրջապատը:
Ըստ «ՀԺ»-ի, պատգամաւորի ընտանիքի դէմ յատուկ
գործողութիւնները սկսուել են Ս.Զատիկեանի սպանութեան գործով
յունիսի 31-ին ձերբակալուած Արսէն Առուշանեանի տուած ցուցմունքներից
յետոյ, երբ նա նշել է Հ.Յակոբեանի շրջապատից ոմանց անուններ:
Ի թիւս այլ վարկածների, թերթը նշում է, որ Ս.Զատիկեանի
սպանութիւնը կապւում է 2005թ.-ի սեպտեմբերի 25-ին
Մալաթիա-Սեբաստիա համայնքում տեղի ունեցած աւագանու
ընտրութիւնների հետ, երբ Ս.Զատիկյանը հաւաքել էր մեծ թւով ձայներ,
եւ Հակոբյանները մտավախութիւն են ունեցել, որ նա կարող է արագ
գրաւել այն դիրքերը, որոնք նախկինում գրաւում էր նրա հանգուցեալ
հայրը: Հետեւաբար «Հակոբյանենք ազդեցութեան ոլորտը կորցնելու խնդիր
են ունեցել, եւ դրա համար կազմակերպուել է Սեդրակ Զատիկեանի
սպանութիւնը»,- նշում է թերթը: