ԵՐԵՎԱՆ, 4 ՅՈՒՆԻՍԻ, ՆՈՅԵԱՆ ՏԱՊԱՆ: Երեւանի Կենտրոն եւ
Նորք-Մարաշ համայնքների առաջին ատեանի դատարանը` դատաւոր Մնացական
Մարտիրոսեանի նախագահութեամբ յունիսի 4-ին հրապարակեց 2006թ.
յունուարին Երեւանի երկու փոխանակման կէտերի վրայ աւազակային
յարձակման գործով դատավճիռը: Դատարանը հիմնաւորուած համարեց
նախաքննութեան կողմից ներկայացուած մեղադրանքը եւ խմբի անդամներից
երկուսին` Վրաստանի քաղաքացի Անդրոնիկ Թորոսյանին եւ ՀՀ քաղաքացի
Սերգեյ Մովսիսեանին դատապարտեց ցմահ ազատազրկման: Ըստ գործի
նիւթերի, Ա.Թորոսյանն է նախաձեռնել Երեւանի փոխանակման կէտերի վրայ
աւազակային յարձակումներ կատարելու «գործը», կազմաւորել խումբ, որի
5 անդամներից 3-ը Վրաստանի քաղաքացիներ են: Աւազակային յարձակման
հետեւանքով սպանուել էր փոխանակման կէտում գտնուող Արթուր Մկրտչեանը.
ըստ գործի նիւթերի, նա սպանուել էր Ս.Մովսիսեանի կողմից դանակի
հարուածներից:
Դատավճռով Վրաստանի միւս երկու քաղաքացիներ Նուգզար
Խոսիտաշվիլին եւ Կարեն Դավթեանը դատապարտուեցին համապատասխանաբար 14
եւ 13 տարուայ ազատազրկման, իսկ ՀՀ քաղաքացի Հայկ Սարգսեանը` 8 տարուայ
ազատազրկման: Դատարանը ամբողջութեամբ բաւարարեց տուժողի
իրաւայաջորդ Ժորա Մկրտչեանի քաղհայցը շուրջ 4 մլն. դրամի չափով: