ՉԵԽ ՅԱՅՏՆԻ ԵՐԱԺԻՇՏՆԵՐԸ ՀԱՄԵՐԳԱՅԻՆ ԾՐԱԳՐՈՎ ՀԱՆԴԷՍ ԿԳԱՆ
ՀԱՅԱՍՏԱՆԻ ՖԻԼՀԱՐՄՈՆԻԿ ՆՈՒԱԳԱԽՄԲԻ ՀԵՏ
05-04-2007 20:00:00 | Հայաստան | Մշակոյթ
ԵՐԵՎԱՆ, 5 ԱՊՐԻԼԻ, ՆՈՅԵԱՆ ՏԱՊԱՆ: Առաջին անգամ եւ միայն մէկ
համերգային ծրագրով «Արամ Խաչատրեան» համերգասրահում ապրիլի 6-ին
Հայաստանի ֆիլհարմոնիկ նուագախմբի հետ հանդէս կգան չեխ յայտնի
երաժիշտներ` դիրիժոր Լեոշ Սվարովսկին եւ ջութակահար Ֆրանտիշեկ
Նովոտնին: Նուագախումբը կղեկավարի Լեոշ Սվարովսկին, կհնչեն
Սմետանայի «Վլատավա» սիմֆոնիկ պոեմը` «Իմ հայրենիք» շարքից,
Քրոնգոլդի Ջութակի կոնցերտը եւ Դվորժակի 7-րդ սիմֆոնիան:
Ինչպէս ապրիլի 5-ին կայացած մամլոյ ասուլիսում նշեցին
երաժիշտները, Հայաստանի ֆիլհարմոնիկ նուագախմբի հրաւէրը իրենք
ընդունել են միանգամից, քանի որ մինչ այդ արդէն լսել էին օրկեստրի
ելոյթները «Պրագայի աշուն» դասական երաժշտութեան փառատոնում: Չեխ
երաժիշտները քաջատեղյակ են հայ դասական երաժշտությանն ու բազմիցս
կատարել են հայ կոմպոզիտորների գործերը:
Ջութակահար Ֆրանտիշեկ Նովոտնին ընդգծեց, որ ինքը յաճախ է
կատարում Արամ Խաչատրեանի Ջութակի կոնցերտը, շատ սիրում եւ
գնահատում է նրա ստեղծագործությունները. «Թերեւս չկայ ջութակահար,
որ այդ մեծ կոմպոզիտորի կոնցերտը կատարած չլինի»:
Չեխ երաժիշտները գոհ են նուագախմբի հետ համագործակցութիւնից:
Նրանց խօսքերով, «կոնտակտը շատ արագ ու սահուն ստացուեց», եւ իրենք
համոզուած են, որ յետագայում եւս կհամագործակցեն նուագախմբի հետ:
Երաժիշտները թէեւ առաջին անգամ են Երեւանում, սակայն
քաջատեղյակ են Հայաստանի եւ հայ ժողովրդի պատմութեանն ու
մշակոյթին: