ՖԻՆԱՆՍԱԿԱՆ ԾԱՌԱՅՈՒԹԻՒՆՆԵՐԻ ՄԱՍԻՆ ՀՀ ՕՐԵՆՍԴՐՈՒԹԻՒՆԸ
ՀԱՄԱՊԱՏԱՍԽԱՆԵՑՒՈՒՄ Է ԵՒՐՈՄԻՈՒԹԵԱՆ ՕՐԷՆՍԴՐՈՒԹԵԱՆԸ
27-02-2007 21:00:00 | Հայաստան | Տնտեսութիւն
ԵՐԵՎԱՆ, 27 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 27-ին ՀՀ
Ազգային Ժողովն ընդունեց նախօրէին քննարկված 15 օրինագծերն ու
օրենսդրական փաթեթները, որոնց գերակշռող մասով փոփոխութիւններ եւ
լրացումներ են կատարւում գործող օրէնքներում:
Մասնաւորապէս, Վարչական իրաւախախտումների վերաբերեալ
օրէնսգրքում 1-ին ընթերցմամբ ընդունուած փոփոխութեամբ ուժը կորցրած
է ճանաչւում զենքով ընտրական տեղամասային կենտրոն մուտք գործելու
վերաբերեալ յօդուածը, քանի որ նոյն արարքի համար պատիժ է սահմանուած
նաեւ ՀՀ Քրէական օրէնսգրքով:
«Մթնոլորտային պահպանութեան մասին» օրէնքում 1-ին ընթերցմամբ
ընդունուած լրացմամբ հստակեցվում են շինարարութիւն իրականացնող
կազմակերպութիւնների պարտաւորութիւնները` շինարարութեան
ընթացքում փոշու արտանետումները կանխարգելելու նպատակով:
ՀՀ Քրէական օրէնսգրքում 1-ին ընթերցմամբ ընդունուած
փոփոխություններով բարձրացւում են ապօրինի անտառահատումների համար
սահմանուած նուազագոյն պատժի` տուգանքների, չափերը:
1-ին ընթերցմամբ ընդունվեցին նաեւ «Որսի կենդանիների
պահպանութեան, պաշտպանութեան, տնտեսութեան եւ որսի վարման մասին»,
«Օրգանական գիւղատնտեսութեան մասին» օրինագծերը, 2-րդ ընթերցմամբ`
«Ապահովագրութեան եւ ապահովագրական գործունէութեան մասին»
օրինագծերի փաթեթը, մասնաւորապէս, ֆինանսական ծառայութիւնների
վերաբերեալ ՀՀ օրենսդրութիւնը համապատասխանեցւում է Եւրոմիութեան
օրէնսդրութեանը, 3-րդ ընթերցմամբ եւ ամբողջութեամբ` «Գործատուների
միութիւնների մասին» օրինագիծը: