Հայաստանի պատմական յուշարձանների վիճակը այսօր ծայրայեղ
անմխիթար եւ մտահոգիչ է,- ահազանգում են ճարտարապետները
19-11-2009 16:42:00 | Հայաստան | Հասարակութիւն
ԵՐԵՎԱՆ, 19 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Հայաստանի պատմական
յուշարձանների վիճակը այսօր ծայրայեղ անմխիթար եւ մտահոգիչ է: Նման
կարծիք յայտնեց նոյեմբերի 19-ի ասուլիսում ճարտարապետների հայկական
ասոցիացիայի նախագահ Գագիկ Սողոմոնեանը:
Ըստ նրա, հանրապետութեան յուշարձանների զգալի մասը գտնւում է
վթարային վիճակում, եւ շատ մեծ է դրանք անվերադարձ կորցնելու
հաւանականութիւնը: Ըստ Գ.Սողոմոնյանի, մի շարք վանական
համալիրներ, այդ թւում Հայոց առաքելական եկեղեցուն փոխանցված,
կարիք ունեն վերականգնողական աշխատանքների: Նրա կարծիքով, պատմական
հուշարձաններհ պահպանման համար յատկացուած պետական ֆինանսաւորման
անբաւարար լինելը պատճառ է հանդիսացել ոչ միայն նրանց վիճակի խիստ
վատթարացմանը, այլեւ մի շարք այլ բացասական հետեւանքների:
«Յուշարձանների մեծամասնութեան վթարային վիճակը վկայում է այն
մասին, որ մեր ազգային մշակոյթային ժառանգութեան պահպանումը եւ
օգտագործումը չի համարւում պետական քաղաքականութեան առաջնահերթ
գործունէութեան ոլորտ: Եվ դա այն ժամանակ, երբ տուրիզմի ոլորտի
զարգացումը համարւում է առաջնային խնդիր»,- ասաց նա:
Գ.Սողոմոնյանի խօսքերով, պատահական չէ, որ զարգացած տուրիզմի
երկրները տարեկան հարիւրաւոր միլիոն եւրօ են տրամադրում իրենց
յուշարձանների պահպանման համար: Օրինակ, Ֆրանսիայում այդ նպատակի
համար տրամադրւում է 149 մլն եւրօ, Իսպանիայում` աւելի քան 1 մլրդ
եւրօ, Ադրբեջանում` 90 մլն եւրօ: Մինչդեռ Հայաստանում 2009թ.-ին
այդ նպատակով տրամադրվել է ընդամէնը 1 մլն եւրօ: «Յուշարձանների
պահպանման համար տրամադրուող չնչին բիւջէտային միջոցները ծախսւում
են անարդիւնաւէտ ձեւով, միջոցների բաշխման անթափանց մեխանիզմով,
առանց հոշարձաններհ մոնիթորինգի եւ անհրաժեշտ հսկողութեան»,- ասաց
Գ.Սողոմոնեանը:
Նա նշեց նաեւ, որ յուշարձանների վերականգնման աշխատանքները
մասնագէտների, շինարարների լուրջ լիցենզաւորման բացակայութեան
պատճառով յաճախ իրականացւում են ոչ որակաւորուած կադրերի կողմից: