«Հայջրմուղկոյուղի»-ն 2009թ.-ը սկսել է բաւականին բարդ
ֆինանսական խնդիրներով
14-04-2009 16:18:00 | Հայաստան | Տնտեսութիւն
ԵՐԵՎԱՆ, 14 ԱՊՐԻԼԻ, ՆՈՅԵԱՆ ՏԱՊԱՆ: «Հայջրմուղկոյուղի»
ընկերութիւնը համաշխարհային ֆինանսատնտեսական ճգնաժամի հետեւանքով
2009թ.-ը սկսել է բաւականին բարդ ֆինանսական խնդիրներով: Այս մասին
ապրիլի 14-ի ասուլիսում յայտնեց ընկերութեան գլխաւոր տնօրէն Պատրիկ
Լորին: Ըստ նրա, տարեսկզբից նուազել են ընկերութեան եկամուտները,
ինչպէս նաեւ պետութեան կողմից տրուող սուբսիդիաները:
«Ընկերութիւնը սպառողներին իւրաքանչիւր 1 խմ խմելու ջրի
մատակարարման համար սակագնի բարձրացում նախատեսում էր յունվարի
1-ից, սակայն այն ուժի մէջ մտաւ ապրիլի 1-ից: Իսկ ընկերութիւնը
յունուարից սկսած վճարում է աւելացուած արժէքի հարկ, որը այս
տարուանից սկսած գանձւում է ստացուած հասոյթից»,- նշեց Պ.Լորին`
յաւելելով, որ դեռեւս 100 հազար բաժանորդներ կանոնաւոր վճարումներ
չեն կատարում, իսկ դա նշանակում է, որ նրանց վճարումներից 20%
ԱԱՀ-ը վճարում է ընկերութիւնը:
Պ.Լորիի խօսքերով, ճգնաժամի հետեւանքով այս ամսից կփակուի
ընկերութեան 4 մասնաճյուղերից մէկը, ինչը կբերի աւելի քան չորս
տասնեակ աշխատատեղերի կրճատման: Բացի դրանից 20%-ով կրճատուել են
աշխատավարձերը, իսկ աշխատանքային շաբաթուայ տեւողությունը 5 օրուանից
կրճատուել է 4-ի: Ըստ տնօրէնի, ընկերութիւնը ճգնաժամից դուրս գալու
համար մշակել է մի շարք միջոցառումներ: Մասնաւորապէս, մամուլում
հրապարակուելու են 2008թ.-ին ջրի սպառման դիմաց չվճարող
բաժանորդների անունները: Արդէն հրապարակուել են Էջմիածին, Գաւառ,
Կապան եւ Հրազդան քաղաքների 100-ական այդպիսի բաժանորդների
անուններ: Նշուեց նաեւ, որ կանոնաւոր վճարումներ կատարած
բաժանորդների համար կկազմակերպուի վիճակախաղ: Արդէն 8 բաժանորդներ
ստացել են 300-հազարական դրամ: