Կառավարութիւնը խտրական վերաբերմունք է ցուցաբերում
ուղեւորափոխադրողների նկատմամբ,- գտնում է դաշնակցական պատգամաւորը
08-04-2009 20:28:00 | Հայաստան | Տնտեսութիւն
ԵՐԵՎԱՆ, 8 ԱՊՐԻԼԻ, ՆՈՅԵԱՆ ՏԱՊԱՆ: Անհատ տաքսիների վարորդների
առջեւ դնելով 10 տարուց աւելի հին մեքենաներ չշահագործելու
պահանջը, կառավարութիւնը սակայն չի բարձրացնում երթուղային
տաքսիների խնդիրը: Մինչդեռ երթուղային տաքսիների մեծ մասը 15 եւ
աւելի տարուայ արտադրութեան են: Ապրիլի 8-ին Հայաստանի Ազգային
Ժողովում այս հարցը բարձրացրեց «ՀՅԴ» խմբակցութեան անդամ Վահան
Յովհաննիսեանը: Ըստ նրա, եթէ խօսքը գնում է ուղեւորների փոխադրման
անվտանգութեան եւ բնապահպանութեան մասին, ապա երթուղային տաքսիները
շատ աւելի մեծ թւով ուղեւորներ են տեղափոխում, եւ նրանց կողմից օդի
աղտոտման վտանգը շատ աւելի մեծ է: «Արդեօ՞ք կառավարութեան նման
կողմնապահության պատճառն այն չէ, որ անհատ տաքսիստները անպաշտպան
են, իսկ երթուղայինների վարորդների յետեւում կանգնած են գծերի
տերերը»,- նշեց Վ.Յովհաննիսեանը:
ՀՀ տրանսպորտի եւ կապի նախարար Գուրգէն Սարգսեանը պարզաբանեց,
որ երթուղային տաքսիների շահագործման ժամկէտը պայմանաւորուած է
երթուղիների սպասարկման արտօնագրերով, որոնց մի մասի գործողութեան
ժամկէտները շուտով կաւարտուեն: Իսկ նոր արտօնագրեր տրամադրելու
դէպքում հին մեքենաները կհանուեն շահագործումից, վստահեցրեց
նախարարը: