Հայաստանը կարեւորում է կարողութիւնների ձեւաւորմանն ու
ինստիտուցիոնալ բարեփոխումներին ուղղուած նախաձեռնութիւնները
27-03-2009 20:42:00 | Հայաստան | Տնտեսութիւն
ԵՐԵՎԱՆ, 27 ՄԱՐՏԻ, ՆՈՅԵԱՆ ՏԱՊԱՆ: Հայաստանի էկոնոմիկայի
նախարար Ներսէս Երիցյանը մարտի 27-ին ընդունել է Հայաստանում
Եւրոպական յանձնաժողովի պատուիրակութեան ղեկավար, դեսպան Ռաուլ դը
Լուզենբերգերին եւ Եւրոմիութեան խորհրդատուական խմբի անդամներին:
Եվրոհանձնաժողովի խումբը Հայաստան է ժամանել` Եւրոպական
հարեւանութեան քաղաքականութեան շրջանակներում ՀՀ պետական
մարմիններին բարեփոխումների գործընթացն առաւել արդիւնաւէտ
դարձնելու համար խորհրդատուական օժանդակություն տրամադրելու
նպատակով:
Ըստ ՀՀ Էկոնոմիկայի նախարարութեան Տեղեկատուութեան եւ
հասարակայնութեան հետ կապերի բաժնի հաղորդագրութեան, խորհրդատուական
խմբի անդամները էկոնոմիկայի նախարարին են ներկայացրել
համագործակցութեան հնարաւոր ոլորտները, այն է` կոռուպցիայի
կանխարգելում եւ հակակոռուպցիոն պայքար, տեղեկատուական
տեխնոլոգիաներ, էլեկտրոնային կառավարում եւ էլեկտրոնային
հասարակութեան ձեւաւորում, պետական կառավարում եւ ֆինանսներ:
Ն.Երիցյանը յայտնել է, որ Հայաստանի կառավարութիւնը չափազանց
կարեւորում է կարողութիւնների ձեւաւորմանն ու ինստիտուցիոնալ
բարեփոխումներին ուղղուած ցանկացած նախաձեռնութիւն: նախարարը նշել
է, որ Եւրոմիութեան խորհրդատուական խմբի օժանդակությունը պահանջված
է եւ ժամանակին ու կնպաստի ԵՄ-ի հետ Ազատ առեւտրի համաձայնագրի
կնքմանը:
Ռաուլ դը Լուզենբերգերի խնդրանքով Ն.Երիցյանը ներկայացրել է
ՀՀ կառավարութեան կողմից իրականացyող ծրագրերի առաջնային
ուղղութիւնները եւ տնտեսական բարեփոխումների գործընթացը` ուղղուած
գործարար միջավայրի, հարկային եւ մաքսային դաշտերի բարելաւմանը,
գիտելիքահէնք տնտեսութեան խթանմանն ու զարգացմանը,
պետութիւն-մասնաւոր հատուածների համագործակցութեան ակտիւացմանը: