«Նաիրիտը» մինչեւ ապրիլի 15-ը կրկին կսկսի կաուչուկ
արտադրել,- հաւաստիացնում է Հայաստանի էներգետիկայի նախարարը
20-03-2009 20:02:00 | Հայաստան | Տնտեսութիւն
ԵՐԵՎԱՆ, 20 ՄԱՐՏԻ, ՆՈՅԵԱՆ ՏԱՊԱՆ: «Նաիրիտ» քիմիական
գործարանը, որը «Հայաստանի էլեկտրական ցանցեր» ընկերութեանը պարտք
է շուրջ 1 մլրդ դրամ (մօտ 2,5 մլն ԱՄՆ դոլար), մարտի 20-ին ՀՀ
Վարչական դատարանում տեղի ունեցած դատական նիստի ժամանակ
պարտաւորուել է մինչեւ ամսուայ վերջը մարել մատակարարուած
էլեկտրաէներգիայի դիմաց կուտակուած պարտքը:
«Հայաստանի էլեկտրական ցանցեր» ընկերութիւնը «Նաիրիտ»-ին
սնանկ ճանաչելու հայցով դիմել էր դատարան` փորձելով «պաշտօնապէս
պարզել` ինչպիսի ֆինանսական հնարաւորութիւններ ունի» իրենց
ամենամեծ սպառողներից մէկը:
«Նաիրիտ գործարան» փակ բաժնետիրական ընկերութեան գլխաւոր
տնօրէն Վահան Մելքոնեանը, ով այսօր գտնւում էր Մոսկուայում,
«Ազատութիւն» ռադիոկայանի հետ հեռախօսազրոյցում յայտարարել է, որ
Ռուսաստանում պատրաստւում է նոր պայմանագրեր կնքել եւ մարել նախկին
պարտքերը: «Գործարանի ակտիւները բազմաթիւ անգամ գերազանցում են այս
գումարը, որով փորձ է կատարւում սնանկ յայտարարել գործարանը: Դա
ողբերգական գումար չէ»,- ասել է Վ.Մելքոնեանը:
Գործարանում էներգակիրների ծախսը կազմում է արտադրուող
կաուչուկի ինքնարժէքի մօտ 70 տոկոսը: Գործարանի պարտքն ընդհանուր
առմամբ շուրջ 45 միլիոն դոլար է, որից 600 հազար դոլարն
աշխատավարձի պարտք է:
Սակայն «Հայէլցանցեր» ընկերութեան տնօրէն Եվգենի Գլադունչիկը
թերահավատ է: «Նաիրիտը չի աշխատում, այն գոյատեւում է: Նրա
աշխատանքի սկզբունքն է պարզապէս մի կերպ գոյատեւել: Խնդիրը հենց
դրանում է: Ընդ որում, սա ամէնեւին էլ առաջին խափանումը չէ: Որքան
որ ես աշխատում եմ նրանց հետ, նրանք միշտ ասում են, որ փող
կունենան վաղը: Այդ վաղը տեւում է արդէն 6 տարի»,- ասել է նա:
Հայաստանի կառավարութիւնը «Նաիրիտ» գործարանի 10 տոկոսի
բաժնետէրն է: Ըստ էներգետիկայի նախարար Արմէն Մովսիսեանի, «Նաիրիտ»
գործարանում ստեղծուած իրավիճակի պատճառը տնտեսական ճգնաժամն է:
«Շրջանառու միջոցները, որոնք դառձել էին արտադրանք, մնացին
պահեստներում: Ժամանակ էր պէտք, որ գները կայունանային եւ շուկայ
գտնուէր, որ կարողանային իրացնել»,- նշել է նախարարը: Նա
հաւաստիացրել է, որ անցած տարուայ դեկտեմբերի 1-ից պարապուրդի
մատնուած գործարանը մինչեւ ապրիլի 15-ը կրկին կսկսի կաուչուկ
արտադրել: