ՀՀ ԿԲ-ի եւ Վերակառուցման եւ զարգացման միջազգային բանկի
միջեւ կնքուել է Հայաստանի ՓՄՁ-ների խրախուսման 50 մլն դոլարի
վարկային պայմանագիր
27-02-2009 23:55:00 | Հայաստան | Տնտեսութիւն
ԵՐԵՎԱՆ, 27 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀՀ Կենտրոնական բանկի եւ
Համաշխարհային բանկի խմբի անդամ հանդիսացող Վերակառուցման եւ
զարգացման միջազգային բանկի (ՎԶՄԲ) միջեւ կնքուել է պայմանագիր 50
մլն ԱՄՆ դոլար գումարի վարկային ռեսուրսների ներգրաւման
վերաբերեալ: Պայմանագիրը ստորագրել են ՀՀ ԿԲ նախագահ Արթուր
Ջաւադեանը եւ Համաշխարհային բանկի երեւանեան գրասենեակի տնօրէն
Արիստոմենե Վարուդակիսը:
Ըստ ՀՀ ԿԲ Հասարակայնութեան հետ կապերի ծառայութեան,
վարկաւորուող ծրագրի նպատակն է Հայաստանում մասնաւոր փոքր ու միջին
ձեռներեցութեան խրախուսումը եւ զարգացումը` միջին ժամկէտայնութեան
վարկային միջոցների հասանելիութեան մակարդակը բարձրացնելու
միջոցով: Ծրագրի իրականացումը նպաստաւոր պայմաններ է ստեղծելու
նաեւ ծրագրում ներգրաւուած հայկական բանկերի համար: Վարկային
միջոցները ՎԶՄԲ-ից ՀՀ ԿԲ-ին են տրամադրւում 26,5 տարի մարման եւ 5
տարի արտօնեալ ժամկէտով` ՀՀ Ֆինանսների նախարարութեան
երաշխավորությամբ:
Վարկային միջոցները տեղաբաշխվելու են ծրագրի գործընկեր
ֆինանսական կազմակերպութիւնների միջոցով, որոնց հետ ՀՀ ԿԲ-ն
կնքելու է վարկային պայմանագրեր: Գործընկեր ֆինանսական
կազմակերպութիւնների ընտրութիւնը իրականացուելու է մրցութային
կարգով` Համաշխարհային բանկի կողմից սահմանուած չափանիշների հիման
վրայ:
Հաշուի առնելով, որ ՀՀ տարածքում գործող ՓՄՁ-ների գերակշիռ
մասի եկամուտներն ու ծախսերն արտայայտւում են ՀՀ դրամով, սպասւում
է, որ վարկերի մեծ մասը կտրամադրուի ազգային արժոյթով, սակայն
ծրագիրը հնարաւորութիւն է ընձեռում վարկաւորումն իրականացնել նաեւ
ԱՄՆ դոլարով, եթէ վարկառուները կներկայացնեն այդպիսի պահանջ եւ
կհիմնաւորեն իրենց արտարժութային եկամուտների աղբիւրները:
Ծրագրի շրջանակներում վարկային միջոցների կարող են հաւակնել
ՀՀ տարածքում գրանցուած մասնաւոր ձեռնարկութիւնները, որոնց տարեկան
շրջանառութիւնը չի գերազանցում 500 միլիոն դրամը (մօտ 1 մլն 635
հազար ԱՄՆ դոլար ):
Ծրագիրն իրականացուելու է ՀՀ ԿԲ կողմից 2001թ.-ին հիմնադրուած
«Գերմանահայկական հիմնադրամ» ծրագրերի կառավարման գրասենեակ»
հիմնարկի միջոցով: