«Սինոփսիս»-ի փոխնախագահն իր նոր դասախոսությունն առաջին
անգամ ներկայացրեց Հայաստանում
26-02-2009 22:42:00 | Հայաստան | Տնտեսութիւն
ԵՐԵՎԱՆ, 26 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Միջազգային
ֆինանսատնտեսական ճգնաժամի հետեւանքով աշխարհում կիսահաղորդչային
էլեկտրոնային սարքերի մտաւոր սեփականութեան վաճառքի ծաւալները
2009թ.-ին կնուազեն շուրջ 200 մլն դոլարով կամ 22%-ով: Այս
կանխատեսումը փետրուարի 26-ին արեց կիսահաղորդիչների նախագծման եւ
արտադրութեան համար ծրագրային միջոցների եւ մտաւոր սեփականութեան
մշակման ոլորտի համաշխարհային առաջատար ամերիկեան «Սինոփսիս»
ընկերութեան մարքեթինգի գծով փոխնախագահ եւ դրա մասնաճիւղ
«Սինոփսիս Արմէնիա»-ի գլխաւոր գործադիր տնօրէն Ռիչ Գոլդմանը`
Հայաստանի պետական ճարտարագիտական համալսարանում հանդէս գալով
դասախոսութեամբ: Դրա թեման էր «Կիսահաղորդաչային տնտեսութեան ներկայ
ճգնաժամի պայմաններում ինտեգրալ սխեմաների նախագծերի ստուգման դերն
ու կարեւորութիւնը», որն առաջին անգամ էր ներկայացւում
հանրութեանը:
Ռ.Գոլդմանը նշեց, որ կիսահաղորդիչների նախագծման գներն
անընդհատ աճում են, եւ մեծանում են այդ ուղղութեամբ ծախսւող
գումարների վերադարձի ռիսկերը. ներկայումս բիւրեղների վրայ տիպական
չիփ-համակարգի նախագծման գինը ներկայումս 100 մլն դոլար է: Ըստ
նրա, նախագծման գնի աճը պայմանաւորուած է ծրագրային ապահովման եւ
նախագծերի ստուգման ծախսերի աճով: Կանխատեսվեց, որ
կիսահաղորդիչների նախագծերի ստուգման գինը գալիք 7 տարիներին կաճի
75%-ով, եւ «Սինոփսիս»-ը նախատեսում է ակտիւացնել այդ ուղղութեամբ
աշխատանքները: Ըստ ընկերութեան պաշտոնյանի, մեծանում է նաեւ
նախագծման «սխալների գինը»:
Նշուեց, որ 2008թ.-ին կիսահաղորդչային սարքերի նախագծման
գիտահետազօտական աշխատանքների ուղղութեամբ ներդրումների վերադարձի
ծաւալը ներդրումների չափը գերազանցել է 9 անգամ: Մասնաւորապէս, 32
նանոմետր տեխնոլոգիայով սարքերի նախագծման համար 100 մլն դոլար
ներդրման դէպքում վերադարձի ծաւալը կարող է կազմել 400 մլն դոլար:
Ընդ որում, միտումն այնպիսին է, որ այդ սարքերի ծրագրային
ապահովման մշակման գնի բաժինը մեծանում է` աստիճանաբար
հաւասարուելով բուն սարքերի նախագծման գնին` կապուած դրանք տարբեր
տիպի սարքաւորումներում օգտագործելու հնարաւորութիւնների
ընդլայնման պահանջարկի մեծացման հետ:
Պատասխանելով «ՆՈՅԵԱՆ ՏԱՊԱՆ»-ի թղթակցի հարցերին, Ռ.Գոլդմանը
նշեց, որ Հայաստանում է երկօրեայ այցով, դասախոսութեամբ հանդէս է
գալու նաեւ Երեւանի պետական համալսարանում, հանդիպումներ է
ունենալու ՀՀ Էկոնոմիկայի նախարարի, ՀՀ նախագահի տնտեսական
հարցերով գլխաւոր խորհրդականի, այս տարի «Սիլիկոնային հովտում»
անցկացուելիք բարձր տեխնոլոգիաների համահայկական «Արմթեք 2006»
երրորդ համաժողովի Հայաստանի կազմկոմիտէի անդամների հետ: