ՀՀ ՍԴ-Ն ՔՆՆԵՑ ԱԺ-Ի 30 ՊԱՏԳԱՄԱՒՈՐՆԵՐԻ ԴԻՄՈՒՄԻ ՀԻՄԱՆ ՎՐԱՅ
ՎԱՐՈՅԹ ԸՆԴՈՒՆՈՒԱԾ ԳՈՐԾԸ
16-01-2007 18:00:00 | Հայաստան | Տնտեսութիւն
ԵՐԵՎԱՆ, 16 ՅՈՒՆՎԱՐԻ, ՆՈՅԵԱՆ ՏԱՊԱՆ: ՀՀ Սահմանադրական
դատարանը յունվարի 16-ի նիստում քննեց Ազգային Ժողովի 30
պատգամաւորների դիմումի հիման վրայ վարոյթ ընդունուած գործը: Ըստ
այդմ վիճարկվում էր «Հանրային ծառայութիւնները կարգաւորող մարմնի
մասին» օրէնքի 12-րդ յօդուածի դրույթի սահմանադրականության հարցը:
Նշուած յօդուվածում, մասնաւորապէս, ամրագրուած է, որ կարգաւորող մարմնի
կողմից սահմանուած սակագների մեծութիւնները դատական կարգով
բողոքարկման ենթակայ չեն: Շուրջ 2 ժամ տեւած լսումների աւարտին ՍԴ-ն
հեռացաւ դռնփակ խորհրդակցութեան` գործով վճիռ կայացնելու համար:
Դիմող կողմի ներկայացուցչի` «Օրինաց երկիր» խմբակցութեան
անդամ Յովհաննէս Մարգարեանի հիմնաւորմամբ, վիճարկւող դրույթը
հակասում է ՀՀ Սահմանադրութեան մի շարք յօդուածներին, որոնցից
առանցքայինը յօդուած 18-րդն է, ըստ որի, մասնաւորապէս,
իւրաքանչիւր ոք ունի իրաւունքների եւ ազատութիւնների
պաշտպանութեան իրաւունք: Ըստ պատգամաւորի, նշանակովի 5 անդամից
բաղկացած Հանրային ծառայութիւնները կարգաւորող յանձնաժողովին
վերապահուած է աննախադէպ գերակայ իրաւունք` որոշելու հանրային
ծառայութիւնների սակագներ, որոնց մեծութիւնները չեն կարող
բողոքարկուել թէ սպառողների, թէ տուեալ ծառայութիւններ մատուցողների
կողմից: Նա նաեւ նկատեց, որ թէեւ օրէնքով նախատեսուած է, որ
յանձնաժողովը կարող է վերանայել սակագները սահմանող սեփական
որոշումները, սակայն նման քայլի չի դիմել այն դէպքում, երբ
սակագների հաշուարկման հիմքում ընկած արտարժոյթի փոխարժեքը վերջին
շուրջ 2 տարիների ընթացքում զգալի փոփոխութիւնների է ենթարկուել:
Նա ՍԴ-ից խնդրեց սահմանադրութեանը հակասող եւ անվաւեր ճանաչել
գործող օրէնքի վերոհիշյալ դրույթը:
Պատասխանող կողմ ճանաչուած ԱԺ-ի ներկայացուցչի` աշխատակազմի
Օրէնսդրութեան վերլուծութեան վարչութեան պետ Աշոտ Խաչատրեանի,
համոզմամբ, վիճարկւող դրույթը ՀՀ Սահմանադրութեանը չի հակասում:
Միաժամանակ նա ընդունեց, որ այն «գուցէ ձեւակերպման իմաստով»
հակասում է ՀՀ Սահմանադրութեան 18-րդ յօդուածով ամրագրուած
իրաւունքներին: Ըստ Ա.Խաչատրեանի, միջազգային պրակտիկայի
ուսումնասիրութիւնը եւս վկայում է, որ սակագների մեծութիւնը այլ
երկրներում բողոքարկման ենթակայ չէ: Նրա կարծիքով, հակառակ դէպքում
սակագին սահմանելու գործառոյթը անկախ կարգաւորող մարմնից կանցնի
դատարանին: «Այլ հարց է, որ դատական կարգով կարող են բողոքարկուել
սակագնի մեծութեան ձեւաւորման մեթոդոլոգիան եւ սկզբունքները»,-
նշեց ԱԺ-ի ներկայացուցիչը: