«Գոյամարտ» Համազգային կուսակցութիւնը, «Փառապանծ» ազատամարտիկների ռազմահայրենասիրական եւ Ղարաբաղի ազատամարտի վետերանների միութիւնները հանդէս են եկել ղարաբաղեան հարցի կարգաւորման վերաբերեալ համատեղ յայտարարութեամբ, որը նշուած կազմակերպութիւնների ղեկավարները հրապարակեցին յուլիսի 21-ի կազմակերպուած ասուլիսում։ «Վերագնահատելով հարաւ կովկասեան տարածաշրջանում գերտերութիւննրի շահերի ընդարձակմանը կամ պահպանմանը միտուած պահանջադրումների շրջանակներում ղարաբաղեան հակամարտութեան խաղաղ կարգաւորման բանակցային գործընթացներում միտուած երեք գերակայ սկզբունքներով արուած առաջարկութիւնները, դրան զուգահեռ` թուրք-ադրբեջանական կողմից պատերազմի վերսկսման ակնյայտ սպառնալքիների ուղեկցութեամբ, արդէն իսկ Կազանում ներկայացուած տասը նոր պահանջադրումները եւ թելադրանքների անհերքելի փաստի առկայութիւնը, ինչպէս նաեւ Եւրոխորհրդի որոշակի անդամ պետութիւնների ներկայացուցիչների կողմից հայ-թուրքական, հայ-ադրբեջանական եւ ղարաբաղեան հակամարտութեան իրողութեան վերաբերեալ անհիմն եւ իրականութիւնը գլխիվայր խեղաթիւրող մեկնաբանութիւնները եւ տրուած գնահատականները, յայտարարում ենք, որ վերը նշուած միջամտութիւնները, կոպիտ եւ անթոյլատրելի պարտադրանքները, բացայայտ շանտաժը եւ իրողութեան ակնյայտ խեղաթիւրումները երբեւիցէ չեն կարող նպաստել ղարաբաղեան հակամարտութեան խաղաղ կարգաւորմանը»,- ասուած է յայտարարութիւնում, որը նոյն օրը փոխանցուելու է Հայաստանում Մակ-ի անդամ երկների դեսպաններին։ Յայտարարութեան հեղինակները նաեւ ՀՀ նախագահից պահանջում են. ա) Ղարաբաղեան հակամարտութեան բանակցութիւննէում հրաժարուել մադրիդեան եւ այլ որակի` անցեալում պարտադրուած եւ իրականութեան խեղաթիւրուած ձեւակերպումներից: Բանակցութիւններ վարել միմիայն Ղարաբաղեան կողմի պարտադիր մասնակցութեամբ: բ) Անյապաղ ետ կանչել հայ-թուրքական արձանագրութիւնների ստորագրութիւնները եւ այն չեղեալ յայտարարել: գ) Պատերազմի վերսկսման հիստերիայ սփռող, պատերազմ տենչացող Ադրբեջանին եւ տարածաշրջանի այլ` թշնամաբար տրամադրուած պետութիւնների անյագ ախորժակը մէկընդմիշտ փակելու համար ցանկացած տեղանքով յարմար զօրավարժութիւնների ժամանակ ցուցադրենք մեր նորագոյն նուաճումներից գոնէ մէկի կործանարար կարողութիւնները»: «Փառապանծ» ազատամարտիկների ռազմահայրենասիրական միութեան նախագահ Գրիշա Սարգսեանը նշեց, որ իրենք պատրաստ են ցանկացած պահին մեծագոյն պատասխանատուութեամբ կատարելու երկրի գերագոյն գլխաւոր հրամանատարի բոլոր կարգի հրամանները:

---