ՏԱՐԵՍԿԶԲԻՑ
ՀԱՅԱՍՏԱՆՈՒՄ ՍՊԱՌՈՂԱԿԱՆ ԳՆԵՐԸ 4,9%-ՈՎ ԱՃԵԼ ԵՆ
31-10-2008 14:04:00 | Հայաստան | Տնտեսութիւն
ԵՐԵՎԱՆ, 31 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանում սպառողական
գների ինդեքսը 2008թ.-ի հոկտեմբերին 2007թ.-ի դեկտեմբերի համեմատ
կազմել է 104,9%, այդ թւում, պարենային ապրանքներինը (ներառեալ
ոգելից խմիչք եւ ծխախոտ) 102,7%, ոչ պարենային ապրանքներինը`
104,4%, իսկ ծառայութիւնների սակագներինը` 109,5%:
ՀՀ Ազգային վիճագրական ծառայութեան տուեալներով, 2008թ.-ի
հոկտեմբերին սեպտեմբերի համեմատ ՀՀ սպառողական շուկայում
արձանագրուել է 0,7% գնաճ, ընդ որում, սեպտեմբեր-հոկտեմբերին
ընդհանուր գնաճը կազմել է 1,2%: Պարենային ապրանքների (ներառեալ
ոգելից խմիչք եւ ծխախոտ) գները 2008թ.-ի հոկտեմբերին սեպտեմբերի
համեմատ աճել են 1,6%-ով, իսկ ոչ պարենային ապրանքների շուկայում
եւ ծառայութիւնների ոլորտում գրանցուել է գների եւ սակագների,
համապատասխանաբար, 0,8% եւ 0,2% գնանկում:
2008թ.-ի յունուար-հոկտեմբերին սպառողական գների միջին ամսական
հավելաճը կազմել է 0,5%, ինչը 0,2 տոկոսային կէտով գերազանցել է
նախորդ տարուայ նոյն ժամանակահատուածում գրանցուած համապատասխան
ցուցանիշը (0,3%):
2008թ.-ի հոկտեմբերին 2007թ.-ի հոկտեմբերի համեմատ սպառողական
գների ինդեքսը կազմել է 108,6%, այդ թւում պարենային ապրանքներինը
(ներառեալ ոգելից խմիչք եւ ծխախոտ)` 108,3%, ոչ պարենային
ապրանքներինը` 106,5%, ծառայութիւնների սակագներինը` 110,3%, իսկ
յունուար-հոկտեմբերին 2007թ.-ի յունուար-հոկտեմբերի համեմատ,
համապատասխանաբար, 109,6%, 111,2, 105,8 եւ 108,6%: