ՉԱԴԻ ԴԱՏԱՐԱՆԸ «ԿԵՆԱՑ ՏԱՊԱՆ» ԿԱԶՄԱԿԵՐՊՈՒԹԵԱՆ ՎԵՑ ՖՐԱՆՍԻԱՑԻ
ԱՇԽԱՏԱԿԻՑՆԵՐԻՆ ԴԱՏԱՊԱՐՏԵԼ Է 8 ՏԱՐՈՒԱՅ ՏԱԺԱՆԱԿՐՈՒԹՅԱՆ
27-12-2007 19:40:00 | | Միջազգային
ՆՋԱՄԵՆԱ, 27 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Ութ տարուայ հարկադիր
աշխատանքների է Չադի դատարանը դատապարտել «Կենաց տապան»
բարեգործական կազմակերպութեան վեց ֆրանսիացի աշխատակիցներին: Այս
մասին յայտարարել են Չադի իշխանութեան ներկայացուցիչները:
Ֆրանսիայի քաղաքացիները մեղաւոր են ճանաչուել Չադից 103
երեխաների անօրինական դուրս բերելու փորձի մէջ: «Կենաց տապան» ոչ
կառավարական կազմակերպութեան աշխատակիցները ձերբակալուել էին
հոկտեմբերի 25-ին Չադի Աբեշե քաղաքում, երբ ոստիկանութիւնը
խափանել էր ինքնաթիռի թռիչքը, որով Ֆրանսիա էին ուղարկուելու 1-ից
10 տարեկան երեխաներ: Այդ օպերացիան իրականացրած ՈԿԿ-ի
աշխատակիցները յայտարարում էին, որ Աֆրիկայից տեղափոխում են
որբերի, որոնք ծնողներից զրկուել են սուդանյան Դարֆուրի մարզում
զինուած հակամարտութեան հետեւանքով: Սակայն աւելի ուշ պարզուել է, որ
երեխաները ոչ թէ Սուդանում էին ապրում, այլ այդ երկրին սահմանակից
Չադի շրջաններում եւ նրանց գերակշիռ մեծամասնութիւնը գոնէ մէկ
ծնող ունի: