ՆՋԱՄԵՆԱ, 27 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Ութ տարվա հարկադիր աշխատանքների է Չադի դատարանը դատապարտել «Կենաց տապան» բարեգործական կազմակերպության վեց ֆրանսիացի աշխատակիցներին: Այս մասին հայտարարել են Չադի իշխանության ներկայացուցիչները: Ֆրանսիայի քաղաքացիները մեղավոր են ճանաչվել Չադից 103 երեխաների անօրինական դուրս բերելու փորձի մեջ: «Կենաց տապան» ոչ կառավարական կազմակերպության աշխատակիցները ձերբակալվել էին հոկտեմբերի 25-ին Չադի Աբեշե քաղաքում, երբ ոստիկանությունը խափանել էր ինքնաթիռի թռիչքը, որով Ֆրանսիա էին ուղարկվելու 1-ից 10 տարեկան երեխաներ: Այդ օպերացիան իրականացրած ՈԿԿ-ի աշխատակիցները հայտարարում էին, որ Աֆրիկայից տեղափոխում են որբերի, որոնք ծնողներից զրկվել են սուդանյան Դարֆուրի մարզում զինված հակամարտության հետեւանքով: Սակայն ավելի ուշ պարզվել է, որ երեխաները ոչ թե Սուդանում էին ապրում, այլ այդ երկրին սահմանակից Չադի շրջաններում եւ նրանց գերակշիռ մեծամասնությունը գոնե մեկ ծնող ունի:

---