«ԱՐԴՇԻՆԻՆՎԵՍՏԲԱՆԿ»-Ը ԿՎԵՐԱԿԱԶՄԱՎՈՐՎԻ ԲԱՑ ԲԱԺՆԵՏԻՐԱԿԱՆ
ԸՆԿԵՐՈՒԹԵԱՆ
26-12-2007 21:00:00 | Հայաստան | Տնտեսութիւն
ԵՐԵՎԱՆ, 26 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: «Արդշինվեստբանկ»-ի
ղեկավարութիւնը նախատեսում է սկսել բանկը փակ բաժնետիրականից բաց
բաժնետիրական ընկերութեան վերակազմաւորելու գործընթացը: Այս մասին
դեկտեմբերի 26-ի ասուլիսում յայտնեց բանկի վարչութեան նախագահ Արամ
Անդրէասեանը:
Նա յայտնեց, որ 2007թ.-ի ընթացքում նախորդ տարուայ համեմատ
«Արդշինինվեստբանկ»-ի ակտիւներն աճել են 34%-ով կամ աւելի քան 23
մլրդ դրամով (կամ մօտ 66,6 մլն ԱՄՆ դոլարով) եւ տարեվերջին կկազմեն
93 մլրդ դրամ, իսկ պարտաւորութիւնները` 28,2%-ով (16 մլրդ դրամով)
եւ տարեվերջին կկազմեն մօտ 75 մլրդ դրամ: Ըստ Ա.Անդրէասեանի,
սպասւում է, որ 2007թ.-ի արդիւնքներով, «Արդշինինվեստբանկ»-ը
կստանայ ՀՀ բանկային համակարգի համար աննախադէպ` աւելի քան 4 մլրդ
դրամի զուտ շահոյթ, որը նախորդ տարուայ ցուցանիշը գերազանցում է 2
անգամ: Շահոյթի եւ բանկի բաժնետէրերի ներդրումների շնորհիւ
«Արդշինինվեստբանկ»-ի ընդհանուր կապիտալը կկազմի մօտ 19 մլրդ դրամ`
տարուայ սկզբի 11 մլրդ դրամի փոխարէն:
Ա.Անդրէասեանի խօսքերով, նախատեսւում է, որ 2008թ.-ին
«Արդշինինվեստբանկ»-ը կթողարկի 3 մլրդ դրամ (մօտ 9,84 մլն ԱՄՆ
դոլար) ընդհանուր ծաւալով պարտատոմսեր:
Նշուեց նաեւ, որ բանկի խոշոր յաճախորդների արտադրութեան
վերազինումը վարկաւորելու նպատակով գերմանական «Landesbank Berlin»
բանկից եւ շուեցարական «Atlantic Forfaiting» ընկերությունից
ստացել են 2 մլն եւրօ գումար` մինչեւ 5 տարի ժամկէտով, իսկ
«American Express»-ը եւ լիբանանեան «Byblosbank»-ը տրամադրել են 2
մլն դոլարի վարկային գծեր` փաստաթղթային գործառնութիւնների
իրականացման համար:
«Արդշինինվեստբանկ»-ի վարչութեան նախագահի խօսքերով, բանկը ՀՀ
բանկային համակարգում առաջին տեղն է զբաղեցնում վարկային
ներդրումների ծաւալով, որը 2007թ.-ի վերջին կկազմի 57 մլրդ դրամ
(աճը` 83%), սպառողական վարկաւորումն աճել է մօտ 3 անգամ եւ
տարեվերջին կկազմի 20 մլրդ դրամ, ներգարավված աւանդներինը` 50%-ով
եւ կկազմի շուրջ 15 մլրդ դրամ:
Բանկը ներկայացուցչութիւն ունի Փարիզում, 49 մասնաճիւղ`
Հայաստանում եւ 2-ը` ԼՂՀ-ում: