ՀՀ անկախության 20-ամյակին եւ ՀԲԸՄ Բուենոս Այրեսի մասնաճյուղի 100-ամյա հոբելյանին նվիրված համերգ
14-10-2011 17:00:07 | Արգենտինա | Քաղաքական
Հայաստանի Հանրապետության անկախության 20-ամյակին եւ Հայկական Բարեգործական Ընդհանուր Միության Բուենոս Այրեսի մասնաճյուղի 100-ամյա հոբելյանին նվիրված տոնակատարությունների շրջանակներում հոկտեմբերի 9-ին Բուենոս Այրեսի քաղաքապետարանի առջեւ տեղի է ունեցել Արա Գեւորգյանի եւ նրա ղեկավարած ազգային գործիքների համույթի համերգը, որը կազմակերպվել էր ՀԲԸՄ-ի Բուենոս Այրեսի մասնաճյուղի, ՀՀ սփյուռքի նախարարության, Արգենտինայում ՀՀ դեսպանության եւ Բուենոս Այրեսի մշակույթի նախարարության աջակցությամբ ու հովանու ներքո:
Միջոցառմանը ներկա էին Բուենոս Այրեսի կառավարության ղեկավար Մաուրիսիո Մակրին, մշակույթի նախարար Էրնան Լոմբարդին, քաղաքապետարանի` համայնքային կառույցների հետ համագործակցության քարտուղար Կլաուդիո Աբրուխը, Հայաստանի Հանրապետության դեսպան Վլադիմիր Կարմիրշալյանը, ՀԸԲՄ-ի եւ Բուենոս Այրեսի համայնքային բոլոր կառույցների ղեկավարները:
Հայաստանից ժամանած երաժիշտների ելույթն աննախադեպ էր թե արգենտինահայերի, թե մայրաքաղաքի մշակութային կյանքում: Բուենոս Այրեսի մշակույթի նախարար Էրնան Լոմբարդիի վկայությամբ` դա «բացառիկ հնարավորություն էր հայկական ժամանակակից երաժշտարվեստին ծանոթանալու համար»:
Հոկտեմբերի 14-ին Արա Գեւորգյանը համերգով հանդես է գալու Արգենտինայի մեծությամբ երկրորդ` Կորդոբա, քաղաքում, իսկ հոկտեմբերի 18-ին` Ուրուգվայի մայրաքաղաք Մոնտեվիդեոյում: