Մարմարա Կիրակի, 22 Մայիսին, Յունական Կիպրոսի մէջ տեղի ունեցան խորհրդարանական ընտրութիւններ, որոնց առընթեր՝ նաեւ փոքրամասնութիւններու պետական ներկայացուցիչներու ընտրութիւններ։ Հայ համայնքի պետական ներկայացուցչի պաշտօնին համար Դաշնակցութեան թեկնածուն էր Վարդգէս Մահտեսեան, առաջադրուած էր նաեւ Անդրանիկ Աշճեանի թեկնածութիւնը։ Քուէարկութիւնը վերջացաւ Վարդգէս Մահտեսեանի յաղթանակով՝ քուէներու 68-32 համեմատութեամբ։ Ըստ կիպրահայ մամուլին, համայնքէն ներս կատարուած աշխատանքներն ու զգալի յառաջընթացը ցոյց տուած են որ Վարդգէս Մահտեսեան ո՛չ միայն փորձառու քաղաքական գործիչ է ու լաւ դիւանագէտ, այլ նաեւ համայնքի նուիրուած ու պատասխանատու անդամ։ Յառաջիկայ հինգ տարիներուն, Վարդգէս Մահտէսեան պիտի ըլլայ Յունական Կիպրոսի օրէնսդիր մարմնին մէջ հայ համայնքի պետական ներկայացուցիչը՝ պաշտպանելով կիպրահայութեան շահերը։

---