ԵՐԵՎԱՆ, 9 ՀՈՒԼԻՍԻ, ՆՈՅՅԱՆ ՏԱՊԱՆ: Որեւիցե տարածքից ղարաբաղյան ուժերի դուրս բերման մասին խոսք չի կարող լինել, քանի դեռ Ադրբեջանը չի համաձայնել ընդունել Ղարաբաղի կարգավիճակը` համաձայն ԼՂ ժողովրդի կամարտահայտության արդյունքների, եւ պատրաստակամություն չի հայտնել դուրս բերելու իր զինված ուժերը ԼՂՀ օկուպացված տարածքներից: Այս մասին հայտարարել է Հայաստանի ԱԳ նախարարի տեղակալ Շավարշ Քոչարյանը: Այդպիսով նա հերքել է Ադրբեջանի արտգործնախարարի այն հայտարարությունը, թե իբր իր եւ Հայաստանի արտգործնախարարի հուլիսի 16-ին կամ 17-ին Ալմաթիում կայանալիք հանդիպման քննարկման գլխավոր առարկան է լինելու Լաչինից եւ Քելբաջարից հայկական զորքերի դուրս բերումը:

---