Նախագահ Սերժ Սարգսյանն այսօր աշխատանքային այցով ժամանել է Մոլդովայի Հանրապետություն:

 

Մինչ մայրաքաղաք Քիշնևում Եվրոպական ժողովրդական կուսակցության Արևելյան գործընկերության առաջնորդների գագաթնաժողովի մեկնարկը, Նախագահ Սերժ Սարգսյանը հանդիպում է ունեցել Մոլդովայի Հանրապետության Նախագահ Նիկոլաե Տիմոֆտիի հետ: Երկու երկրների ղեկավարները քննարկել են հայ-մոլդովական քաղաքական երկխոսությունն ակտիվացնելու և առևտրատնտեսական ոլորտում համագործակցությունը զարգացնելու վերաբերյալ հարցերի լայն շրջանակ: Նախագահ Սերժ Սարգսյանը նշել է, որ դիվանագիտական հարաբերությունների հաստատումից հետո երկկողմ հարաբերությունների ամրապնդման և զարգացման գործում առկա ներուժը լիարժեքորեն չի օգտագործվել, և այժմ անհրաժեշտ է երկկողմ ակտիվ աշխատանքով, հաճախակի փոխայցելություններով ու տարբեր մակարդակի հանդիպումներով լրացնել բաց թողնվածը, ինչը բխում է երկու բարեկամ ժողովուրդների շահերից: Սերժ Սարգսյանը կարևորել է նաև միջազգային կազմակերպությունների շրջանակներում սերտ փոխգործակցությունը:

 

Երկու երկրների նախագահների երկկողմ, ապա ընդլայնված ձևաչափով բանակցություններից հետո տեղի է ունեցել փաստաթղթերի ստորագրման արարողություն: Մասնավորապես, ստորագրվել են ՀՀ մշակույթի նախարարության և ՄՀ մշակույթի նախարարության միջև համագործակցության մասին համաձայնագիր և ՀՀ գյուղատնտեսության նախարարության և ՄՀ գյուղատնտեսության և սննդարդյունաբերության նախարարության միջև տնտեսական և գիտատեխնիկական համագործակցության մասին համաձայնագիր:

 

Նախագահ Սերժ Սարգսյանը հանդիպում է ունեցել նաև Մոլդովայի վարչապետ Յուրի Լյանկեի հետ, քննարկել՝ փոխշահավետ տարբեր ոլորտներում Հայաստանի և Մոլդովայի միջև տնտեսական համագործակցության զարգացման հնարավորությունները: Զրուցակիցները, այդ առումով, երկուստեք կարևորել են ՀՀ և ՄՀ միջև առևտրատնտեսական համագործակցության միջկառավարական հանձնաժողովի դերը: Այս մասին «ՆՏ»-ին հայտնեցին ՀՀ նախագահի աշխատակազմի հասարակայնության և տեղեկատվության միջոցների հետ վարչությունից:

 

Նոյյան տապան  -   Քաղաքական