Հայաստան կայցելի «Россия 2» հեռուստաընկերության «Язь против еды» հաղորդաշարի նկարահանող խումբը
04-09-2013 16:12:24 | Հայաստան | Մամլո հաղորդագրություն
Հայաստանի ազգային մրցունակության հիմնադրամը սույն թվականի սեպտեմբերի 4-11-ին կկազմակերպի ռուսական հեղինակավոր «Россия 2» հեռուստաընկերության «Язь против еды» հաղորդաշարի նկարահանող խմբի այցելությունը Հայաստանը:
Այցի նպատակն է ռուսաստանյան լայն հեռուստալսարանին ներկայացնել Հայաստանի ազգային խոհանոցը, ավանդական ուտեստների առանաձնահատկությունները և դրանց պատրաստման եղանակները:
Հայաստանի ազգագրությանն ու պատմությանն առավելապես ծանոթանալու նպատակով նկարահանող խումբը հնարավորություն կունենա նաև՝ այցելելու Հայաստանի տեսարժան վայրերը և ծանոթանալու բազմաբնույթ զբոսաշրջային արդյունքներին, մասնավորապես պատմամշակութային հարուստ ժառանգությանը և հոգևոր արժեքներին:
Այցի արդյունքում կնկարահանվի 26 րոպեանոց ֆիլմ Հայաստանի մասին, որը կցուցադրվի «Россия 2» հեռուստաալիքով:
Սույն նախաձեռնությունը հանդիսանում է ռուսաստանյան թիրախային շուկայում Հայաստանի ազգային մրցունակության հիմնադրամի զբոսաշրջության խթանմանն ուղղված ծրագրերից մեկը և նպատակ ունի բարձրացնել Հայաստանի՝ որպես գրավիչ զբոսաշրջային վայրի վերաբերյալ ճանաչելիության մակարդակը ռուսաստանյան շուկայում՝ խթանելով ներգնա զբոսաշրջային հոսքերի աճին:
Հայաստանի ազգային մրցունակության հիմնադրամի
Հանրային կապերի գրասենյակ
***
Հայաստանի ազգային մրցունակության հիմնադրամը անկախ կառույց է, որը հիմնվել է Հայաստանի Հանրապետության Կառավարության և հայազգի առաջատար գործարարների համագործակցության սկզբունքով: Հիմնադրամի առաքելությունն է տնտեսության առանցքային ոլորտների բեկումնային զարգացման միջոցով բարձրացնել ազգային մրցունակությունը: Սույն առաքելությամբ Հիմնադրամը պետական-մասնավոր համագործակցության սկզբունքով ներգրավում է ռազմավարական նշանակության ներդրումներ և իրականացնում է Հայաստանի տնտեսական զարգացման համար կենսականորեն կարևոր ծրագրեր: