Հայաստանի վարչապետն աշխատակազմերին է ներկայացրել երկու
նորանշանակ նախարարներին
16-03-2010 16:18:00 | Հայաստան | Քաղաքական
ԵՐԵՎԱՆ, 16 ՄԱՐՏԻ, ՆՈՅՅԱՆ ՏԱՊԱՆ: Հայաստանի վարչապետ Տիգրան
Սարգսյանը մարտի 16-ին երկու նախարարությունների աշխատակազմերին է
ներկայացրել նորանշանակ նախարարներ Մանուկ Վարդանյանին եւ Արմեն
Երիցյանին: Այս մասին «ՆՏ»-ին հայտնեցին ՀՀ կառավարության
Տեղեկատվության եւ հասարակայնության հետ կապերի վարչությունից:
Տրանսպորտի եւ կապի նախարարության աշխատակազմին ներկայացնելով
Մ.Վարդանյանին, վարչապետն ասել է. «Մեր պետականաշինության մեջ
Մանուկ Վարդանյանը հայտնի գործիչ է: Նա իրեն դրսեւորել է որպես
հմուտ կառավարիչ, փորձառու մարդ, եւ այդ առումով կարծում եմ, որ
նախարարության աշխատանքներում խնդիրներ չեն առաջանա, քանի որ նա
լավ է տիրապետում կառավարման համակարգի բոլոր կանոններին: Այսօր
նաեւ Մանուկ Վարդանյանի ծննդյան օրն է: Ցանկանում եմ բոլորիս
անունից շնորհավորել Մանուկ Վարդանյանին` մի կողմից նախարարի
պաշտոնում նշանակվելու, մյուս կողմից` ծննդյան օրվա առթիվ, եւ
հուսով եմ, որ այդ տոնական տրամադրությունը կփոխանցվի նաեւ
կոլեկտիվին»: Տ.Սարգսյանը շնորհակալություն է հայտնել տրանսպորտի
եւ կապի նախկին նախարար Գուրգեն Սարգսյանին կատարած աշխատանքի
համար:
Ա.Երիցյանին ներկայացնելով Արտակարգ իրավիճակների
նախարարության աշխատակազմին, Տ.Սարգսյանը նշել է, որ Ա.Երիցյանը
կառավարման համակարգի կանոններին քաջատեղյակ մարդ է, եւ դա հույս է
ներշնչում, որ նախարարի փոփոխությունը համակարգում սահուն տեղի
կունենա, ցնցումներ չեն լինի եւ բնականոն աշխատանքները
կշարունակվեն: Վարչապետը շնորհակալություն է հայտնել արտակարգ
իրավիճակների նախկին նախարար Մհեր Շահգելդյանին կատարած աշխատանքի
համար եւ համոզմունք հայտնել, որ աշխատանքների այն նոր ճակատը, որ
«Օրինաց երկիր» կուսակցությունն այս պահին առաջնահերթ է համարել
Մ.Շահգելդյանի համար, նա նույնպես կկարողանա պատվով կատարել: