Գերման Ստերլիգովին հարցաքննել են Լեռնային Ղարաբաղի հանրապետություն այցելելու գործով
02-12-2015 17:46:34 | Ռուսաստան | Քաղաքական
Ռուսաստանի Քննչական կոմիտեն հարցաքննել է գործարար Գերման Ստերլիգովին, ով ադրբեջանական իշխանությունների կողմից մեղադրվում է չճանաչված Լեռնային Ղարաբաղի հանրապետություն այցի համար:
Ինչպես տեղեկացնում է gazeta.ru-ն` հղում անելով Interfax.net-ին, Ստերլիգովի խոսքերով, որոշ ժամանակ առաջ նրան կանչել են Քննչական կոմիտե, որտեղ երկու աշխատակից իրենից ցուցմունք են վերցրել: Հարցերը հիմնականում վերաբերել են ադրբեջանական կողմից հնչող մեղադրանքներին և Ստերլիգովին արտահանձնելու խնդրանքին:
Ինչպես նշել է Ստերլիգովը, քննիչներն ասել են նրան, որ «Ռուսաստանը իր քաղաքացիներին չի հանձնում» և նրա արտահանձնման մասին խոսք չի գնում:
Բաքուն մեղադրում է Ստերլիգովին, որ նա և նրա ընտանիքը «շրջանցելով անցակետերը, տեղափոխվել են օկուպացված տարածք` չունենալով ադրբեջանական սահմանն անցնելու մասին վկայող համապատասխան փասթաթղթեր»:
Ադրբեջանը միջազգային հետախուզում էր հայտարարել Ստերլիգովի նկատմամբ, սակայն գործարարի խոսքերով հետախուզումը դադարեցվել է: