Ղրղզստանում ստեղծվել է Ժողովրդական վստահությանկառավարություն
08-04-2010 15:00:00 | Ղրղզստան | Քաղաքական
ԲԻՇՔԵԿ, 8 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Ղրղզստանի
խորհրդարանը լուծարվել է: Բոլոր օրենսդիր գործառույթները, նախագահի
եւ կառավարության լիազորությունները իրականացնելու է ժամանակավոր
կառավարությունը, որը կգործի իշխանության հանձնման դեկրետի
համաձայն` 6 ամիս ժամկետով. ըստ ռուսաստանյան լրատվամիջոցների`
հայտարարել է Ղրղզստանի ժամանակավոր կառավարության ղեկավար Ռոզա
Օթունբաեւան: Ըստ նրա, այդ ընթացքում փոփոխություններ կարվեն
Սահմանադրության մեջ, ընտրական օրենսգրքում, կուսակցությունների
մասին եւ երթեր ու հանրահավաքներ անցկացնելու մասին օրենքում:
Օթունբաեւան նաեւ հայտարարել է, որ կիջեցվեն էլեկտրաէներգիայի
սակագները, ինչը հանրահավաքների ընթացքում հնչած հիմնական
պահանջներից էր, կլուծվի երկրի ռազմավարական օբյեկտները վաճառելու
հարցը:
Հիշեցնենք, որ ապրիլի 7-ին ժողովրդական հուզումներ են տեղի
ունեցել Ղրղզստանի ողջ տարածքում: Իշխանությունների հետ բախումների
արդյունքում զոհվել է մոտ 100 մարդ: Ղրղզստանի նախագահ Կուրմանբեկ
Բակիեւը լքել է երկրի մայրաքաղաքը, կառավարությունը հրաժարական է
տվել: Բիշքեկում ձեւավորվել է Ժողովրդական վստահության
կառավարություն, որը գլխավորում է Ղրղզստանի նախկին արտգործնախարար
Ռոզա Օթունբաեւան: