Երեւանում կայացած հայ-իրանական միջկառավարական հանձնաժողովի
9-րդ նիստի շրջանակներում կնքվեց փոխըմբռնման հուշագիր
27-01-2010 20:14:00 | Հայաստան | Տնտեսություն
ԵՐԵՎԱՆ, 27 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 27-ին Երեւանում
կայացած հայ-իրանական միջկառավարական հանձնաժողովի 9-րդ նիստի
շրջանակներում ՀՀ էներգետիկայի եւ բնական պաշարների նախարար Արմեն
Մովսիսյանը եւ Իրանի Իսլամական հանրապետության արտաքին գործերի
նախարար Մանուչեհր Մոթթաքին ստորագրեցին «Հայ-իրանական
միջկառավարական հանձանժողովի 9-րդ համատեղ նիստի փոխըմռնման
հուշագիր»:
Ինչպես նշեց Ա.Մովսիսյանը, փաստաթուղը զարգացման բավականին
մեծ հեռանկար է բացում երկու երկրների տնտեսությունների եւ
ժողովուրդների համար: Փաստաթուղթն իր մեջ ընդգրկում է տնտեսության
բոլոր ոլորտները, ինչպես նաեւ մշակույթը: «Մնում է միայն աշխատել,
որպեսզի այս ծրագրերը կարողանանք կյանքի կոչել: Ուզում եմ խորին
շնորհակալություն հայտնել մեր իրանացի գործընկերներին, Մ.Մոթաքիին
այն կառուցողական մոտեցումների համար, որի արդյունքում ստեղծվեց
այս փաստաթուղթը: Եվ վստահ եմ, որ հաջորդ միջկառավարական
հանձնաժողովի նիստի ժամանակ կարձանագրենք բավականին դրական
տեղաշարժեր»,- ասաց Ա.Մովսիսյանը:
Ըստ Մ.Մոթթաքիի, երկու երկրների ղեկավարներն ունեն հաստատուն
կամք` հարաբերությունների զարգացման եւ ընդլայնման ուղղությամբ,
իսկ նախարարները, մասնավոր հատվածը պարտականություն ունեն
իրագործել այն ռազմավարությունը, որը մշակվել է երկու երկրների
ղեկավարների կողմից: Նա եւս նշեց, որ այս փաստաթուղը բոլոր
ոլորտների ներկայացուցիչների հավաքական ջանքերի արդյունքն է` սկսած
առեւտրից, գյուղատնտեսությունից, տրանսպորտային խնդիրներից,
էներգետիկայից, մինչեւ մաքսային խնդիրների դյուրացում:
Իրանի արտգործնախարարը նաեւ տեղեկացրեց, որ նիստի ժամանակ
քննարկվել են առեւտրի ոլորտի որոշ խնդիրներ: «Մեր որոշումը
կայանում է նրանում, որ եթե կան ապրանքներ, որոնք պետք է
ներմուծվեն Հայաստան, ապա առաջնահերթությունը տրվի Իրանին: Եվ
հակառակը, եթե Իրանը կարիք ունի ապրանքների ներմուծման եւ որոնք
կան այստեղ, ապա առաջնահեթությունների մեջ լինի Հայաստանը»,- նշեց
Մ.Մոթթաքին` հավելելով, որ բարեփոխումներ պետք է կատարվեն այն
ենթակառուցվածքներում, որոնք նպաստում են առեւտրի զարգացմանն ու
առեւտրաշրջանառության ավելացմանը:
ԻԻՀ-ի արտգործանախարը, անդրադառնալով ՀՀ նախագահի հետ
հանդիպմանը, կարեւոր համարեց այն, որ նախագահը հատուկ
ուշադրություն է դարձնում 3 ռազմավարական նախագծերի, որոնք Իրանի
եւ Հայաստանի հարաբերություններին նոր բնույթ կհաղորդեն: Դրանք են`
տրանսպորտային ոլորտում երկու երկրների միջեւ ուղիղ երկաթուղային
կապի ստեղծումը եւ նոր ճանապարհի կառուցումը, Արաքս գետի վրա ՀԷԿ-ի
եւ նավթամթերքներ տեղափոխող խողովակաշարի կառուցումը: Ըստ նրա, այս
երեք նախագծերի վերաբերյալ հուշագրում ամրագրված կետերի իրագործման
դեպքում Իրանի եւ Հայաստանի հարաբերությունները էական փոփոխության
կենթարկվեն: «Մենք ուրախ ենք, որ մեր հարեւան եւ բարեկամ երկիր
Հայաստանը այս նախագծերի իրականացման առանցքային դերակատարություն
է ձեռք բերելու` հյուսիս-հարավ առանցքի, տրանսպորտային եւ տարանցիկ
խնդիրների առումով»,- ընդգծեց Մ.Մոթթաքին:
Նշենք, որ հայ-իրանական միջկառավարական հանձնաժողովի 9-րդ
նիստի շրջանակներում փոխըմբռնման հուշագիր ստորագրվեց նաեւ
Զարգացման հայկական գործակալության եւ Իրանի ներդրումների
տնտեսական եւ տեխնիկական աջակցության կազմակերպության միջեւ`
Իրան-Հայաստան ներդրումային կոմիտե ստեղծելու մասին: