ՀԲ-ն հաստատել է Արմավիրի եւ Թալինի մայր ջրանցքների
վեկանգնման ծրագիրը
29-07-2009 22:00:00 | Հայաստան | Տնտեսություն
ԵՐԵՎԱՆ, 29 ՀՈՒԼԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Համաշխարհային բանկի գործադիր տնօրենների խորհուրդը հաստատել է
Հայաստանի ոռոգման համակարգերի վերականգնման հրատապ ծրագիրը, որի
արժեքն է 30 մլն ԱՄՆ դոլար: Այս մասին հուլիսի 29-ի ասուլիսում
հայտնեց ՀԲ-ի երեւանյան գրասենյակի տնօրեն Արիստոմենե Վարուդակիսը:
Ծրագրի շրջանակներում կվերականգնվեն Արմավիրի եւ Թալինի մայր
ջրանցքները: «Կվերականգնվեն մոտ 84 կմ երկարությամբ հիմնական
ջրանցքներ, ինչի շնորհիվ ջրի կորուստները կնվազեն մինչեւ 70 հազար
խորանարդ մետրով եւ ոռոգելի կդառնան 7300 հա հողատարածքներ»,- նշեց
Ա.Վարուդակիսը:
Բացի այդ, ըստ նրա, ծրագիրը կնպաստի մոտ 9000 մարդ/ամիս
աշխատատեղերի ստեղծմանը, եւ ծրագրի ավարտին վերականգնման
աշխատանքների ուղղակի շահառուներ կլինեն 73 համայնքների մոտ 39
հազար ջրօգտագործողներ:
Ծրագրով նախատեսված աշխատանքները կսկսվեն այս տարվա
նոյեմբերին: Ծրագիրը, որը վարկավորում է Վերակառուցման եւ
զարգացման միջազգային բանկը, կավարտվի մինչեւ 2011թ.-ի հունիսը:
Անդրադառնալով ոռոգման համակարգում ՀԲ-ի եւ Ծրագրերի
իրականացման գրասենյակի համագործակցությանը, Ա.Վարուդակիսը այն
արդյունավետ համարեց: Համատեղ աշխատանքի ավելի քան 15 տարվա
ընթացքում ավելացել են ոռոգվող հողատարածքները, ներդրվել են
ոռոգման առավել արդյունավետ տեխնոլոգիաներ, այդ թվում էլէներգիա
չպահանջող ինքնահոս համակարգեր:
«Մենք օգնել ենք նաեւ ստեղծել ջրօգտագործողների
ընկերություններ, եւ հաջորդ քայլը կլինի օգնել ստեղծել
ջրօգտագործող ընկերությունների միություն»,- նշեց ՀԲ-ի երեւանյան
գրասենյակի տնօրենը: