Հայաստանի նախագահն ընդունել է Ռուսաստանի եւ Թուրքիայի
արտգործնախարարներին
16-04-2009 20:00:00 | Հայաստան | Քաղաքական
ԵՐԵՎԱՆ, 16 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի նախագահ Սերժ
Սարգսյանը ապրիլի 16-ին ընդունել է Ռուսաստանի Դաշնության արտաքին
գործերի նախարար Սերգեյ Լավրովին, ով Երեւան է ժամանել Սեւծովյան
տնտեսական համագործակցության (ՍԾՏՀ) կազմակերպության անդամ
երկրների արտաքին գործերի նախարարների խորհրդի 20-րդ նիստին
մասնակցելու նպատակով:
Ս.Սարգսյանը եւ Ս.Լավրովը քննարկել են հայ-ռուսական
ռազմավարական դաշնակցային հարաբերություններին, ինչպես նաեւ
Հայաստանի նախագահի Ռուսաստանի Դաշնություն կատարելիք առաջիկա
աշխատանքային այցին վերաբերող հարցեր: Հանդիպման ընթացքում
անդրադարձ է կատարվել նաեւ երկկողմ հետաքրքրություն ներկայացնող
տարածաշրջանային եւ միջազգային խնդիրների:
Ըստ ՀՀ նախագահի Մամլո գրասենյակի հաղորդագրության, նույն օրը
Ս.Սարգսյանն ընդունել է Թուրքիայի արտաքին գործերի նախարար Ալի
Բաբաջանին, ով նույնպես Երեւանում է գտնվում ՍԾՏՀ-ի անդամ երկրների
արտգործնախարարների խորհրդի նիստին մասնակցելու նպատակով:
Հանդիպման ընթացքում քննարկվել են հայ-թուրքական
հարաբերությունների կարգավորմանը վերաբերող հարցեր:
Հանդիպմանը մասնակցել են նաեւ Հայաստանի արտգործնախարար
Էդվարդ Նալբանդյանը եւ Թուրքիայի Արտաքին գործերի փոխնախարար
Էրթուղրուլ Ապականը: