Ըստ ԲՀԿ-ի ներկայացուցչի, հայ-թուրքական հարաբերությունների
կարգավորման համար երբեւէ չպետք է հրաժարվել ցեղասպանության
ճանաչման պահանջից
10-04-2009 19:10:00 | Հայաստան | Քաղաքական
ԵՐԵՎԱՆ, 10 ԱՊՐԻԼԻ, ՆՈՅՅԱՆ ՏԱՊԱՆ: Հայ-թուրքական
հարաբերությունների կարգավորման հարցում Թուրքիայի քաղաքական միտքը
բաժանվել է երկու մասի,- ապրիլի 10-ի ասուլիսում նշեց Հայաստանի
Ազգային Ժողովի «Բարգավաճ Հայաստան» խմբակցության քարտուղար Արամ
Սաֆարյանը: Նրա խոսքերով, թուրք պահպանողական-ազգայնական ուժերը
Հայաստանի հետ հարաբերությունները կապում են հայտնի նախապայմանների
հետ` հրաժարում Հայոց ցեղասպանության ճանաչման պահանջից, հրաժարում
Լեռնային Ղարաբաղից եւ այլն: Իսկ թուրքական իշխող վերնախավի մյուս
ուժերը գտնում են, որ թեեւ հայերը երբեք չեն հրաժարվի
ցեղասպանության ճանաչման պահանջից, Հայաստանի հետ անհրաժեշտ է
երկխոսել: Ա.Սաֆարյանի կարծիքով, հենց նշված երկու տարբեր
մոտեցումներն են պատճառը, որ թուրք պաշտոնյաները մերթ խոսում են
հայ-թուրքական հարաբերությունների կարգավորման անհրաժեշտությունից,
մերթ էլ հիշում են, որ այդ կարգավորմանը կխանգարի ղարաբաղյան
խնդիրը:
Հայաստանը, ինչպես շեշտեց Ա.Սաֆարյանը, ի սկզբանե հռչակել է,
որ Թուրքիայի հետ հարաբերությունների հաստատման կողմնակից է` առանց
նախապայմանների: «Ես հիմա որպես քաղաքական գործիչ հայտարարում եմ,
որ Հայաստանի որեւէ քաղաքական ուժ երբեւէ չպետք է հայ-թուրքական
կապերի բարելավման անվան տակ հրաժարվի ցեղասպանության պահանջից:
Հրաժարվելը մեծ խնդիրներ կառաջացնի մեզ համար եւ կվտանգի
Հայաստան-Սփյուռք հարաբերությունները»,- ասաց Ա.Սաֆարյանը: Նա
հույս հայտնեց, որ Հայաստանի իշխանությունները եւս դա հասկանում
են:
Անդրադառնալով հայ-թուրքական սահմանի բացմանը, ԲՀԿ-ի
ներկայացուցիչը նշեց, որ իշխանությունները պետք է նախապատրաստեն
պետական կառավարման մարմիններին` ոստիկանությանը, ազգային
անվտանգությանն ու մյուսներին, նրանց աշխատանքը հարմարեցնեն այն
պայմաններին, որոնք կստեղծվեն սահմանի բացման արդյունքում:
Ա.Սաֆարյանի կանխատեսմամբ, սահմանի բացումից հետո Թուրքիայի
քաղաքացիների հոսքը Հայաստան կուժեղանա: