ԵՐԵՎԱՆ, 1 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 1-ից ուժի մեջ է մտել «Հայաստանի Հանրապետության կենտրոնական բանկի նորմատիվ իրավական ակտերի նախագծերի վերաբերյալ հանրության կողմից կարծիքների ներկայացման հնարավորություն ընձեռելու վերաբերյալ» կարգը, որը հավանության է արժանացել ՀՀ ԿԲ խորհրդի փետրվարի 10-ի նիստում: Ըստ ԿԲ-ի Հասարակայնության հետ կապերի ծառայության, www.cba.am կայքի «Նախագծեր» բաժնում պարբերաբար տեղադրվելու են ԿԲ-ի հրապարակման ենթակա նորմատիվ իրավական ակտերի նախագծերը` վերջիններիս վերաբերյալ հանրության կողմից կարծիք ստանալու նպատակով: ԿԲ-ի նորմատիվ իրավական ակտի նախագծի վերաբերյալ կարծիքներ կարող են ներկայացվել ԿԲ նախաձեռնող ստորաբաժանմանը` նախագծի կայքում տեղադրման օրվանից 14 աշխատանքային օրվա ընթացքում եւ ստորաբաժանումների էլեկտրոնային փոստի հասցեներով: Կարծիքների ընդունման ժամկետի ավարտից հետո ներկայացված կարծիքները 10 աշխատանքային օրվա ընթացքում կքննարկվեն ԿԲ-ում: Անհրաժեշտության դեպքում, կարծիքների հեղինակները կհրավիրվեն ԿԲ` մասնակցելու այդ քննարկումներին: Կայքի նույն բաժնում, եռամսյակային պարբերականությամբ ներկայացված կարծիքների վերաբերյալ տեղադրվելու է ամփոփ վիճակագրական տեղեկանք:

---