«Լուսավոր Հայաստանը» շրջանառության մեջ է դրել գերեվարված և անհայտ կորած անձանց ընտանիքների աջակցության նախագիծ

03-12-2020 11:35:13   | Հայաստան  |  Հասարակություն
 


ԱԺ «Լուսավոր Հայաստան» խմբակցությունը շրջանառության մեջ է դրել գերության մեջ հայտնված և անհայտ կորած
անձանց ընտանիքների դրամական ապահովության խնդիրը կարգավորող նախագիծ: Այդ մասին Ֆեյսբուքի էջում հայտնել է «Լուսավոր հայաստան» խմբակցության ղեկավար Էդմոն Մարուքյանը: 
 
«Սիրելի՛ հայրենակիցներ,
 
Տեղեկացնում եմ, որ ՀՀ ԱԺ «Լուսավոր Հայաստան» խմբակցությունը շրջանառության մեջ է դրել օրենքների նախագծերի փաթեթ՝ գերության մեջ հայտնված և անհայտ կորած մեր հայրենակիցների ընտանիքների դրամական ապահովության խնդիրը կարգավորելու նպատակով։
 
Մասնավորապես, գործող
օրենքը նախատեսում է, որ գերի ընկած պայմանագրային զինծառայողները պահպանում են պաշտոնային դրույքաչափը, որը, սակայն, վճարվում է միայն այն բանից հետո, երբ հաստատվում է, որ գերության մեջ հայտնվելը՝ զորամասը կամ ծառայության վայրը կամ մարտադաշտն ինքնակամ թողնելու կամ կամովին գերի հանձնվելու հետևանք չէ։
 
Գործող օրենքով, փաստացի, գերեվարված զինծառայողները դիտարկվում են մեղավոր՝ մինչ այն պահը, երբ նրանք կապացուցեն, որ հանցանք չեն գործել։
 
Այսինքն՝ խախտվում է Սահմանադրությամբ նախատեսված անմեղության կանխավարկածը։ Ավելին՝ սա բացարձակապես այն վերաբերմունքը չէ, որին արժանի են մեր զինծառայողները։
 
Միաժամանակ, օրենքը որևէ պետական աջակցություն չի նախատեսում անհայտ կորած զինծառայողների, գերի ընկած ժամկետային զինծառայողների, կամավորագրված կամ այլ քաղաքացիական անձանց համար։
 
Նախագծով առաջարկվում է գերության մեջ հայտնված կամ ռազմական գործողությունների կապակցությամբ անհայտ կորած ճանաչված զինծառայողների, այդ թվում՝ կամավորական հիմունքներով մարտական գործողությունների մասնակիցների ընտանիքներին հատկացնել ամենամսյա դրամական օգնություն, քանի դեռ հարուցված վարույթով չի ապացուցվել հանցագործության փաստը։
 
Նախագծով առաջարկվում է նաև ամենամսյա նպաստ վճարել գերության մեջ հայտնված քաղաքացիական անձանց ընտանիքների անդամներին»,- գրել է Մարուքյանը։
Նոյյան տապան   -   Հասարակություն
Լուրեր Հայաստանից եւ Սփյուռքից

Կարդացել են 397 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար