Ինֆլյացիոն ռիսկերից խուսափելու համար պետք է փոփոխություններ
կատարվեն հարկաբյուջետային քաղաքականության մեջ
04-03-2009 21:00:00 | Հայաստան | Տնտեսություն
ԵՐԵՎԱՆ, 4 ՄԱՐՏԻ, ՆՈՅՅԱՆ ՏԱՊԱՆ: Եթե լողացող փոխարժեքի
ժամանակ չենք ցանկանում ստանալ ինֆլյացիոն ռիսկեր, ապա պետք է
փոփոխություններ կատարվեն հարկաբյուջետային քաղաքականության մեջ:
Այսինքն, ինչպես մարտի 4-ի ասուլիսում հայտարարեց տնտեսագետ
Անդրանիկ Թեւանյանը, պետք է իրականացվի բյուջեի կառուցվածքի
փոփոխություն, բյուջեի եկամտային մասի, ինչպես նաեւ ծախսային մասի
կրճատում 20%-ի չափով: Բացի դրանից տնտեսագետը առաջարկում է
գործածությունից հանել հսկիչ դրամարկղերը, անցնել հաստատագրված
վճարի եւ միայն մրցակցային դաշտ ապահովելուց հետո ներդնել
ՀԴՄ-ները:
Ա.Թեւանյանի խոսքերով, Հայաստանում ֆինանսական ճգնաժամի
հիմքերը դրվել են դեռեւս 2007թ.-ին, երբ «Հանրապետական»
կուսակցությունը ամբողջ հսկիչ փաթեթը վերցրեց ԱԺ-ից` փոխելով
տնտեսական քաղաքականությունը: Դրանից հետո բյուջեի ծախսային մասը
1,7 մլրդ ԱՄՆ դոլարից դարձավ 2,5 մլրդ: Հաջորդ տարվանից
բյուջեն արդեն 3,1 մլրդ դոլարի ծախսային մաս ունի, որն է'լ ավելի
ծանր հարկային բեռ է բիզնեսմենների, հատկապես փոքր եւ միջին
բիզնեսի համար:
Այս քաղաքականության արդյունքում, ըստ տնտեսագետի, 2008թ.-ին
փոքր ու միջին բիզնեսը հայտնվեց ծանր վիճակում, իսկ երկրորդ
կիսամյակից արդեն զգացվեց արտասահմանից ստացվող տրանսֆերտների
պակասը, շինարարության կրճատումը եւ այլն: «Փոքր եւ միջին բիզնեսի
համար 2009թ.-ը շատ ծանր է լինելու: «Այստեղ տնտեսական ճգնաժամը
կապ չունի, սա բիզնեսի եւ հարկաբյուջետային քաղաքականության,
տնտեսությունը վերաբաշխելու հետեւանք է»,- ընդգծեց Ա.Թեւանյանը`
հավելելով, որ այստեղից նաեւ «կրիմինալի հոտ է գալիս»: