Երեւանում մեկնարկել են Հայ-գերմանական միջկառավարական
երկօրյա խորհրդակցությունները
25-02-2009 20:00:00 | Հայաստան | Տնտեսություն
ԵՐԵՎԱՆ, 25 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 25-ին Երեւանում
մեկնարկել են Հայ-գերմանական միջկառավարական երկօրյա
խորհրդակցությունները, որոնց ընթացքում կքննարկվեն գործող եւ ապագա
ծրագրերը:
Հայ-գերմանական ֆինանսական համագործակցությունը կենտրոնացած է
երեք հիմնական ոլորտներում` ֆինանսական եւ մասնավոր հատված,
էներգետիկա, ջրամատակարարում եւ ջրահեռացում: Համեմատաբար
փոքրածավալ դրամաշնորհային ծրագրեր են իրականացվում
առողջապահության եւ բնապահպանության ոլորտներում:
Ըստ ՀՀ ֆինանսների նախարարության տեղեկատվության եւ
հասարակայնության հետ կապերի բաժնի հաղորդագրության, 2008թ.-ին
կնքված «ԳԴՀ կառավարության եւ ՀՀ կառավարության միջեւ
2007-2008թթ.-ի ֆինանսական համագործակցության մասին» համաձայնագրի
շրջանակներում նախատեսվում է իրականացնել հետեւյալ ծրագրերը.
«Բնակարանային ֆինանսավորման շուկա (Հիպոթեքային շուկա)»
ծրագրի II փուլը - 6 մլն եվրո,
«Հիդրոէլեկտրակայանների Որոտան կասկադ (խառը ֆինանսավորում)»
ծրագիրը - 29 մլն եվրո,
«Գյումրի II բարձրավոլտ էլեկտրակայանի վերականգնում» ծրագիրը
- մինչեւ 14,6 եվրո,
«Հայաստան-Վրաստան էլեկտրահաղորդման բարձրավոլտ գծի
կառուցում» ծրագիրը - մինչեւ 20,4 մլն եվրո,
«Համայնքային ենթակառուցվածքների վերականգնում այլ
շրջանակներում. Փուլ 2-րդ (ՀԵԾ II) - հարակից միջոցառումներ»
ծրագիրը - 3 մլն եվրո,
«Տուբերկուլյոզի դեմ պայքարի» ծրագրի II փուլը - 1 մլն եվրո
դրամաշնորհ:
ԳԴՀ-ի կառավարության կողմից միջոցները տրամադրվել են արտոնյալ
պայմաններով` 40 տարի մարման ժամկետով, 0,75 տոկոսով, 10 տարի
մարման արտոնյալ ժամկետով:
Ընդհանուր առմամբ հայ-գերմանական ֆինանսական
համագործակցության շրջանակներում մինչ օրս Հայաստանին տրամադրվել է
շուրջ 235 մլն եվրո (որից 195 մլն եվրո վարկ եւ 40 մլն եվրո
դրամաշնորհ):