Հայաստանը պատրաստ է օժանդակել Մխիթարյան միաբանության առջեւ
ծառացած խնդիրների լուծմանը
23-02-2009 23:00:00 | Հայաստան | Քաղաքական
ԵՐԵՎԱՆ, 23 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի նախագահ Սերժ
Սարգսյանը փետրվարի 23-ին ընդունել է Մխիթարյան միաբանության
ընդհանրական աբբահայր, ծայրագույն վարդապետ հայր Եղիա Քիլաղպյանին
եւ Հայաստանի Մխիթարյան կրթահամալիրի տնօրեն հայր Սերոբ
Չամուրլյանին: Նա բարձր է գնահատել Մխիթարյան միաբանության
պատմական դերակատարությունը եւ նշել, որ Հայաստանը որպես
պետություն պարտավոր է հետաքրքրվել Միաբանության գործերով,
հնարավորինս օժանդակել առկա խնդիրների լուծմանը:
Մխիթարյանները Ս.Սարգսյանի հետ խոսել են իրենց
մտահոգությունների, մասնավորապես, Միաբանության համալրման խնդրի եւ
ապագա ծրագրերի մասին: Անդրադարձ է եղել նաեւ Մուրադ Ռաֆայելյան
վարժարանին, Հայաստանի Մխիթարյան կրթահամալիրի գործունեությանը,
համատեղ կրթական, մշակութային ձեռնարկների իրականացմանը:
Ըստ ՀՀ նախագահի Մամլո գրասենյակի հաղորդագրության,
Ս.Սարգսյանը վստահեցրել է, որ պետությունը պատրաստ է իր
հնարավորությունների շրջանակում օժանդակել Մխիթարյան միաբանության
առջեւ ծառացած խնդիրների լուծմանը: