Արմեն Մարտիրոսյան. «Հայաստանի իշխանությունների եւ
եվրոկառույցների գործարքի մասին լուրերը որոշակի հիմքեր ունեն»
29-01-2009 18:55:00 | Հայաստան | Քաղաքական
ԵՐԵՎԱՆ, 29 ՀՈՒՆՎԱՐԻ, ՆՈՅՅԱՆ ՏԱՊԱՆ: Մեկնաբանելով արմատական
ընդդիմության այն տեսակետը, թե ձայնի իրավունքից չզրկվելու դիմաց
Հայաստանի իշխանությունները եվրոկառույցների հետ գաղտնի
բանակցություններում համաձայնվել են զիջումների գնալ Ղարաբաղի
հարցում, «Ժառանգություն» խորհրդարանական խմբակցության ղեկավար
Արմեն Մարտիրոսյանը հունվարի 29-ի ասուլիսում հայտարարեց, որ այդ
մտավախությունները որոշակի հիմքեր ունեն: Պատգամավորի դիտարկմամբ,
հստակ է նաեւ այն, որ միջազգային ասպարեզում թուլացած Հայաստանը
ցանկացած մարտահրավերի առջեւ լինելու է անպաշտպան, այդ թվում եւ
ԼՂՀ խնդրի առումով:
Ա.Մարտիոսյանը հայտնեց նաեւ, որ «Ժառանգություն»
կուսակցության առաջնորդ Րաֆֆի Հովհաննիսյանը չի մասնակցելու
Եվրոխորհրդի խորհրդարանական վեհաժողովի (ԵԽԽՎ) աշխատանքներին
այնքան ժամանակ, մինչեւ ԵԽ-ն համապատաասխանի իր իսկ որդեգրած
արժեքներին: Նա նշեց, որ Հայաստանի իշխանությունները առ այսօր
պատշաճ կերպով չեն իրականացրել ԵԽ-ի նախորդ բանաձեւերի կետերը,
հետեւաբար Ր.Հովհաննիսյանը` որպես վեհաժողովում հայկական
պատվիրակության անդամ, չի կարող որեւէ կատարված քայլ ներկայացնել
ԵԽ-ին:
Պատասխանելով այն հարցին, թե ինչպե՞ս են «Ժառանգության»
անդամները վերաբերվում Հայ ազգային կոնգրեսի (ՀԱԿ) կողմից ԵԽ
ներկայացուցիչներ գործուղելուն, Ա.Մարտիոսյանը նշեց, որ որեւէ
պարսավելի արարք դրանում չի տեսնում: «ՀԱԿ-ը քաղաքական ուժ է, որը
ԵԽ-ին ասելիք եւ պահանջ ունի: Որեւէ վատ բան չկա նրանում, որ
կոնգրեսը հայաստանյան վիճակի վերաբերյալ ինֆորմացիա է հաղորդել
վեհաժողովին»,- ասաց նա: