Հայաստանի պատրաստակամ է ակտիվորեն համագործակցելու Եվրոպական
Հանձնաժողովի հետ
19-01-2009 23:00:00 | Հայաստան | Քաղաքական
ԵՐԵՎԱՆ, 19 ՀՈՒՆՎԱՐԻ, ՆՈՅՅԱՆ ՏԱՊԱՆ: Անցյալ տարի Հայաստան-ԵՄ
հարաբերություններն ակտիվորեն զարգացել են, շարունակվել է
Եվրոպական ընտանիքին մերձենալու Հայաստանի քաղաքականությունը: Այս
մասին աշխատանքային այցով Երեւան ժամանած Եվրոպական հանձնաժողովի
արտաքին հարաբերությունների եւ Եվրոպական հարեւանության
քաղաքականության գծով հանձնակատար Բենիտա Ֆեռերո-Վալդների հետ
հունվարի 19-ին հանդիպմանը նշել է ՀՀ արտգործնախարար Էդվարդ
Նալբանդյանը: Քաղաքական երկխոսության առումով կարեւորվել է
2008թ.-ի նոյեմբերին ՀՀ նախագահի այցելությունը Բրյուսել եւ
հանդիպումները Եվրոպական կառույցների ղեկավարների հետ, դրանց
ընթացքում ձեռք բերված պայմանավորվածությունները եւ դեկտեմբերին
Բրյուսելում կայացած Հայաստան-Եվրոպական Միություն խորհրդի նիստը:
Բ.Ֆեռերո-Վալդները, գոհունակություն հայտնելով Հայաստանի հետ
ծավալվող գործընկերության կապակցությամբ, ողջունել է Հայաստանի
պատրաստակամությունը ընդունելու ԵՄ խորհրդատուներին, որոնք պետք է
աջակցեն Հայաստանում բարեփոխումների գործընթացին: Նա ՀՀ
արտգործնախարարին ներկայացրել է Եվրոպական հանձնաժողովի «Արեւելյան
գործընկերություն» առաջարկության հիմնադրույթները` նշելով, որ այդ
ծրագիրն առավել սերտ համագործակցության հնարավորություններ է
ընձեռում:
Ողջունելով «Արեւելյան գործընկերության» առաջարկությունը,
Է.Նալբանդյանն ընդգծել է Հայաստանի պատրաստակամությունը ակտիվորեն
համագործակցելու Եվրոպական Հանձնաժողովի հետ այդ ոլորտում:
Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ
ՏԱՊԱՆ»-ին տրամադրած հաղորդագրության, զրուցակիցները քննարկել են
նաեւ արցախյան հիմնախնդրի կարգավորման գործընթացին վերաբերող
հարցեր: Այդ ենթատեքստում ողջունվել է 2008թ.-ի նոյեմբերի 2-ի
Մոսկովյան հռչակագիրը եւ դեկտեմբերի 4-5-ին Հելսինկիում ԵԱՀԿ
արտգործնախարարների խորհրդի ընթացքում ընդունված փաստաթղթերը
արցախյան հիմնախնդրի վերաբերյալ: Մտքեր են փոխանակվել նաեւ
հայ-թուրքական հարաբերությունների կարգավորման հնարավորությունների
շուրջ, անդրադարձ է կատարվել մի շարք միջազգային եւ
տարածաշրջանային հարցերի: