Աթենքում տեղի է ունեցել Արմենոֆասի հանձնախմբի հանդիպումը
10-05-2010 20:25:00 | Լիբանան | Հասարակություն
ԱՆԹԻԼԻԱՍ, 10 ՄԱՅՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Մեծի տանն
Կիլիկիո Արամ Ա կաթողիկոսի հովանավորությունը վայելող Արմենոֆասի
հանձնախումբը իր տարեկան հանդիպումն է ունեցել Աթենքում: Այս մասին
տեղեկացնում են Անթիլիասի մայրավանքից: Հիշյալ հանձնախմբում Մեծի
Տանն Կիլիկիո կաթողիկոսությունից մաս են կազմում Խորեն եպիսկոպոս
Տողրամաջյանը, Տիգրան Ճինպաշյանը, ատենապետուհի Թենի Սիմոնյանը,
Աթենքից Հայկուհի Յաղճյանը, Ժնեւից Ալեքսան Քյոչեյանը եւ
Շվեյցարիայի եկեղեցիների 3 ներկայացուցիչ:
Թենի Սիմոնյանը փոխանցել է Վեհափառ Հայրապետի օրհնությունն ու
հանձնախմբի կատարած աշխատանքի բարձր գնահատականը: Արմենոֆասի
նպատակն է իր տրամադրության տակ եղած գումարներով` հիմնադրամի
տարեկան տոկոսից հատկացումներ կատարել կաթողիկոսության ծրագրերին,
հատկապես Հունաստանի Ազգային ծերանոցին, որը միշտ վայելել է
շվեյցարական եկեղեցիների անմիջական օժանդակությունը: Իր նիստերի
ընթացքում հանձնախումբը ուրախությամբ հաստատել է, որ Աթենքի
Ազգային ծերանոցը լուրջ բարեկարգություններ է կատարել: Այս առիթով
հանձնախումբը որոշել է 30.000 շվեյցարական ֆրանկ հատկացնել
ծերանոցին: