Երեւանում յուրօրինակ նշվեց Մամուլի ազատության համաշխարհային
օրը` լուսանկարչական ցուցահանդեսի միջոցով
03-05-2010 20:30:00 | Հայաստան | Հասարակություն
ԵՐԵՎԱՆ, 3 ՄԱՅԻՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Մայիսի 3-ին`
Մամուլի ազատության համաշխարհային օրվա առթիվ, Երեւանում բացվեց
լուսանկարչական ցուցահանդես` նվիրված արտահայտվելու, խոսքի,
ինֆորմացիա ստանալու ազատության թեմաներին: Միջուցառումը
կազմակերպվել էր Ինֆորմացիայի ազատության կենտրոնի, ԱՄՆ Միջազգային
զարգացման գործակալության, ԵԱՀԿ-ի եւ ՄԱԿ-ի երեւանյան
գրասենյակների կողմից: Ինչպես «ՆՈՅՅԱՆ ՏԱՊԱՆ»-ի թղթակցի հետ
զրույցում նշեց միջոցառման կազմակերպիչ` Ինֆորմացիայի ազատության
կենտրոնի տնօրեն Շուշան Դոյդոյանը, միջոցառման նպատակն է եղել
իշխանությունների, հանրության ուշադրությունը հրավիրել նշված
հարցերում առկա խնդիրների վրա: Իսկ հասարակության մեջ կարծիք կա,
որ Հայաստանում մամուլը ազատ չէ եւ որ հաճախ խախտվում է մարդկանց
տեղեկատվություն ստանալու իրավունքը:
Լուսանկարչական ցուցահանդեսին մասնակցելու համար ներկայացված
60 հեղինակների 300 լուսանկարներից ընտրվել է 21 հեղինակի 30
լուսանկարՆ հեղինակները քաղաքացիներ, պրոֆեսիոնալ լուսանկարիչներ
եւ լրագրողներ են:
Ցուցադրված աշխատանքների թվում էր նաեւ «ՆՈՅՅԱՆ ՏԱՊԱՆ
Հայլայթս» անգլալեզու շաբաթաթերթի գլխավոր խմբագիր Հարություն
Խաչատրյանի «Հացադուլավոր ազատամարտիկը հանրահավաքում» լուսանկարը:
Հայաստանում ԱՄՆ արտակարգ եւ լիազոր դեսպան Մարի Յովանովիչը
լրագրողների հետ զրույցում նկատեց, որ «Ֆրիդոմ հաուս»
կազմակերպության մամուլի ազատության հետազոտությամբ Հայաստանը
որակվել է որպես «ոչ ազատ», իսկ դա նշանակում է, որ այս
ուղղույթամբ աշխատանք կա կատարելու: Ի պատասխան լուսանկարչական
ցուցահանդեսի մասին հարցի, դեսպանը նշեց. «Որոշ լուսանկարներ
ծիծաղելի են, որոշները մի փոքր պրովոկացիոն բնույթ ունեն, բայց
բոլոր լուսանկարներում կարեւորվում է իրազեկ լինելու գաղափարը»:
Դեսպանը ընդգծեց, որ այս իրավունքը հիմնարար իրավունքներից մեկն է,
դրա կարեւորության մասին է խոսում ԱՄՆ հիմնադիր հայրերից մեկը`
Թոմաս Ջեֆֆերսոնի կատարած ընտրությունը. «որտեղ կնախընտրեիք
ապրել` մի երկրում, որտեղ չկա կառավորությո՞ւն, թե որտեղ` ազատ
մամո՞ւլ» հարցին մի առիթով Թ.Ջեֆֆերսոնը հայտարարել է, որ
կնախընտրեր ապրել այնտեղ, որտեղ կա ազատ մամուլ: