Հունաստանում անցկացվում են Հայոց Ցեղասպանության 95-ամյակին
նվիրված միջոցառումներ
24-04-2010 17:30:00 | Հունաստան | Քաղաքական
ԱԹԵՆՔ, 24 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Հայոց
ցեղասպանության 95-ամյակի հիշատակի եւ ոգեկոչման արարողությունների
մեկնարկը Հունաստանի մայրաքաղաք Աթենքում տրվեց ապրիլի 23-ի
երեկոյան: Աթենքի Սինտագմա կենտրոնական հրապարակում կազմակերպվել է
հունահայ սիրված երգիչ Հայկ եւազըջյանի եւ Համազգային հայ կրթական
եւ մշակութային միության Հունաստանի շրջանային վարչության
երիտասարդական պարախմբերի համերգը: Հանդիսավոր միջոցառումների եւ
դրան նախորդած օրերին Սինտագմա հրապարակում նաեւ կազմակերպվել է
գեղանկարչական աշխատանքների ցուցահանդես: Տեղակայվել է տաղավար,
որտեղ ցուցադրվում են տեսաժապավեններ, պատմական լուսանկարներ եւ
գրքեր` հույն հանրությանը ցեղասպանության մասին ավելի լայնորեն
իրազեկելու եւ ցեղասպանության 95-ամյակի ոգեկոչմանը նրանց մասնակից
ու հաղորդակից դարձնելու նպատակով:
Ապրիլի 24-ին, Աթենքի Նեա Զմիռնի /«Նոր Զմյուռնիա»/ թաղամասի
«Զանգակ» հուշակոթողի մոտ տեղի կունենա ցեղասպանության զոհերի
հիշատակի ոգեկոչման արարողություն, իսկ ապրիլի 25-ին «Ատտիկոն»
սրահում կկայանա հիշատակի արարողությունների կենտրոնական ձեռնարկը:
Ապրիլի 25-ին ցեղասպանության 95-ամյակի միջոցառումներ
կանցկացվեն նաեւ Հունաստանի Սալոնիկ եւ Կոմոթինի քաղաքներում: