Կայացավ իսպանահայ տենոր Վահրամ Թադեւոսյանի համերգը Երեւանում
14-04-2010 21:30:00 | Հայաստան | Մշակույթ
ԵՐԵՎԱՆ, 14 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Երեւանի «Արամ
Խաչատրյան» համերգասրահում կայացավ իսպանահայ տենոր Վահրամ
Թադեւոսյանի համերգը: Թադեւոսյանին նվագակցում էր Հայաստանի
պետական կամերային նվագախումբը` դիրիժոր Վարդան Հակոբյանի
ղեկավարությամբ: Երգիչը համերգը բացեց Մակար Եկմալյանի «Օրհնյալ է
Աստված Քրիստոս պատարագյալ» երգով: Հնչեցին ինչպես համաշխարհային,
այնպես էլ հայ դասական ստեղծագործություններ:
«Շատ կարեւոր է, որ սփյուռքում ապրած հայ տաղանդավոր
երիտասարդները հոգեւոր կամրջով կապվեն հայրենիքի հետ, իրենց ներուժը
բերեն, իրենց աջակցությունը ցույց տան հայկական մշակույթին»,-
նշել է ՀՀ Սփյուռքի նախարարության համահայկական ծրագրերի
վարչության մշակութային, սպորտի եւ երիտասարդական ծրագրերի բաժնի
պետ Նադյա Անտոնյանը:
«Վահրամ Թադեւոսյանը իր հիասքանչ եւ անկրկնելի կատարումներով,
եվրոպական, հայ դասական եւ ժողովրդական բարձրագույն երգարվեստով
գերել է ֆրանսիացիներին, իտալացիներին, գերմանացիներին, ինչպես
նաեւ մեր հայրենակիցներին, որոնք այդ երգերի շնչով եւ
հոգեբանությամբ ոգեւորված կգոյատեւեն ընդմիշտ` աշխարհի որ ծայրում
էլ ապրելիս լինեն: Այս ամենի հետ նա աշխարհին է ներկայացնում նաեւ
հայոց երգի դարավոր պատմությունը», - ասված է Հայաստանի պատվո
հյուպատոս Լուիս Բարբարա Զապատերոյի ուղերձում:
ՀՀ Սփյուռքի նախարար Հրանուշ Հակոբյանի հրամանով, ով եւս ներկա
էր համերգին, Թադեւոսյանը պարգեւատրվեց նախարարության պաատվոգրով` հայ
ինքնության պահպանմանը, հայ մշակույթի զարգացմանը նպաստելու եւ հայ
մաշկույթը լավագույնս ներկայացնելու համար: