Բայդենը խնդրեց, որ գամ և փոխանցեմ իր ուղերձը՝ ԱՄՆ-ն աջակցում է Հայաստանի ինքնիշխանությանը. Փաուեր
25-09-2023 21:50:20 | Հայաստան | Ի՞նչ է գրում մամուլը
ԱՄՆ նախագահ Ջո Բայդենն է խնդրել ԱՄՆ Միջազգային զարգացման գործակալության տնօրեն Սամանթա Փաուերին, որ նա այցելի Հայաստան և իր անունից փոխանցի ուղերձ, որ ԱՄՆ-ն աջակցում է Հայաստանի ինքնիշխանությանը, տարածքային ամբողջականությանը և ժողովրդավարությանը:
«Արմենպրես»-ի փոխանցմամբ՝ Սամանթա Փաուերն այս մասին ասաց Հայաստանում ԱՄՆ դեսպանությունում հրավիրված ասուլիսում:
«Ես Հայաստանում եմ, քանի որ նախագահ Բայդենը ինձ խնդրել է, որ ես գամ Հայաստան: Սա նախապես պլանավորված այցելություն չէր: Այս այցը տեղի ունեցավ, քանի որ նախագահ Բայդենը խնդրեց, որ գամ և իր անունից ուղերձ փոխանցեմ վարչապետին, ուղերձ առ այն, որ Միացյալ Նահանգները աջակցում է Հայաստանի ինքնիշխանությանը, տարածքային ամբողջականությանը և ժողովրդավարությանը»,-ասաց Փաուերը:
ԱՄՆ Միջազգային զարգացման գործակալության տնօրենը հավելեց՝ իր համար պատիվ է, որ ուղերձը ԱՄՆ պետքարտուղարի տեղակալ Յուրի Քիմի հետ փոխանցել է Հայաստանի վարչապետ Նիկոլ Փաշինյանին:
Միջազգային զարգացման գործակալության (USAID) ղեկավար Սամանթա Փաուերը և ԱՄՆ պետքարտուղարի՝ Եվրոպայի և Եվրասիայի հարցերով օգնականի պաշտոնակատար Յուրի Քիմը սեպտեմբերի 25-ին ժամանել են Հայաստան՝ հաստատելու ԱՄՆ աջակցությունը Հայաստանի ինքնիշխանությանը, անկախությանը, տարածքային ամբողջականությանը, ժողովրդավարությանը, ինչպես նաև քայլեր ձեռնարկելու Լեռնային Ղարաբաղում տեղի ունեցած վերջին բռնություններից բխող հումանիտար կարիքների բավարարման ուղղությամբ։
ՀԱՅԵՐԵՆ
Русский
English
Դաս. հայերեն
French
