Մեկնարկեց Ազգային գրադարանի հերթական գրադարանային շաբաթը
11-04-2011 14:48:25 | Հայաստան | Մշակույթ
Գրադարանային շաբաթը «գրատպություն`գիտելիքի հավերժական ներկայություն» կարգախոսով բացեց Ազգային գրադարանի տնօրեն Դավիթ Սարգսյանը:
Գրադարանային շաբաթվա ամեն օրն ունի իր խորհուրդը. կան հայկական գրատպությանը, հոբելյանական միջոցառումներին, գիրք նվիրելուն, ընտանեկան ընթերցանությանը նվիրված օրեր: Գրադարանային շաբաթի մեկնարկին միացել են նաեւ ՀՀ տարածաշրջանի բոլոր գրադարանները, որոնք եւս իրենց տարածաշրջանում նշում են գրադարանային շաբաթը:
Տնօրենը հայտնեց գրադարանային շաբաթի նպատակը, որն է` կարեւորել գրադարանների դերը, քաղաքակիրթ դարձնել հասարակությանը, ունենալ գեղագիտորեն զարգացած հասարակություն, քանի որ երկրի քաղաքակրթության մակարդակը ուղիղ համեմատական է գործող գրադարանների մակարդակին:
Պարոն Սարգսյանը նշեց ոչ միայն գրադարանային շաբաթի նպատակները, այլեւ խնդիրները, եւ ցանկություն հայտնեց, որ ԱԺ ընդունի գրադարանի մասին օրենք, որ բարելավվի գործող գրադարանների վիճակը: Ազգային գրադարանի խնդիրներից է նաեւ աշխարհում լույս տեսնող բոլոր հայկական գրքերի, աշխատությունների համախմբումը, մշակումը եւ պահպանումը:
Գրադարանային շաբաթի մեկնարկի առիթով ընտրվեց նաեւ Ազգային գրադարանի հիմնը: