ԴԵՌԵՎՍ ՈՐՈՇՎԱԾ ՉԵՆ ՀԱՅԱՍՏԱՆԻՆ ԻՐԱՆԱԿԱՆ ԳԱԶԻ ՄԱՏԱԿԱՐԱՐՄԱՆ
ԺԱՄԿԵՏՆԵՐԸ
13-10-2008 17:20:00 | Հայաստան | Տնտեսություն
ԵՐԵՎԱՆ, 13 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանին իրանական
գազի մատակարարման ժամկետները դեռեւս որոշված չեն: Հայկական եւ
իրանական կողմերը պայմանավորվել են Հայաստանին իրանական գազի
մատակարարումն ապահովել հայկական կողմի համար անհրաժեշտության
դեպքում: Տվյալ պահին նման անհրաժեշտություն չկա: Այս մասին
«ՆՈՅՅԱՆ ՏԱՊԱՆ»-ի թղթակցին հայտնեց Հայաստանի էներգետիկայի
նախարարության մամուլի քարտուղար Լուսինե Հարությունյանը:
Հիշեցնենք, որ վերջին ժամանակներս հայկական եւ իրանական
կողմերի միջեւ բանակցություններ էին վարվում Հայաստանին իրանական
գազի մատակարարման ժամկետների մասին:
Կանխավ Հայաստանի էներգետիկայի նախարար Արմեն Մովսիսյանը
լրագրողներին հայտնել էր, որ գազատարի շինարարական աշխատանքները
կավարտվեն 2009 թվականի սկզբին, այդուհանդերձ նախարարը չէր
բացառել, որ աշխատանքները կարող են ավարտվել նաեւ ընթացիկ տարվա
վերջին: Երկու երկրների համապատասխան գերատեսչությունների
պայմանավորվածությունների համաձայն, Հայաստանը Իրանի մատակարարած
գազի դիմաց կվճարի էլեկտրաէներգիայով` մեկ խորանարդ մետր գազի
դիմաց 3 կՎտ/ժ հաշվարկով:
Հիշեցնենք, որ Իրան-Հայաստան գազատարի առաջին հերթի
շինարարությունը ավարտվեց 2007 թվականի մարտին: Կառուցված
Մեղրի-Քաջարան տեղամասի հզորությունը կազմում է տարեկան 1,2 մլրդ
խ/մ գազ: Իրանական գազի Հայաստան ներմուծման ծավալների
մեծացման նպատակով սկսվել է Իրան-Հայաստան գազատարի երկրորդ հերթի,
մասնավորապես Քաջարան-Արարատ տեղամասի շինարարությունը, 150 կմ
երկարությամբ եւ տարեկան 2,3 մլրդ խ/մ թողունակությամբ: