ԱԿՆԿԱԼՎՈՒՄ Է, ՈՐ ԱՅՍ ՏԱՐԻ ԵՎՍ ՀԱՅԱՍՏԱՆԸ ԿՈՒՆԵՆԱ ՀՆԱ-Ի
ԵՐԿՆԻՇ ԱՃ
08-10-2008 22:00:00 | Հայաստան | Տնտեսություն
ԵՐԵՎԱՆ, 8 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ակնկալվում է, որ այս
տարի եւս Հայաստանը կունենա ՀՆԱ-ի երկնիշ աճ` շինարարության
բնագավառում բուռն ակտիվության շնորհիվ: Այս մասին նշվում է «Գրանթ
թորնթոն» ընկերության հրապարակած 2008թ-ի միջազգային գործարար
զեկույցի Հայաստանին վերաբերող հատվածում, որը հոկտեմբերի 8-ին
ներկայացրեց ընկերության Հայաստանի ներկայացուցիչ Գուրգեն
Հակոբյանը:
Զեկույցի համաձայն, սննդամթերքի ներկրման, նավթի միջազգային
բարձր գների, նաեւ ներքին մեծ պահանջարկի վրա հիմնվելով կարելի է
ակնկալել, որ տարվա վերջին սպառողական գների ինդեքսի աճը կկազմի
մոտ 7%` գերազանցելով գնաճի հայտարարված 4%-ը: Այդուհանդերձ, ըստ
Գ.Հակոբյանի, այս ցուցանիշն ավելի ցածր է, քան հարեւան երկրներինը,
եւ ակնկալվում է, որ 2009թ.-ին այն կնվազի` հայտնվելով հայտարարված
սահմանում: Նշվեց, որ այս տարի բյուջեն կունենա ՀՆԱ-ի 1,2%-ի չափով
պակասուրդ, որը հնարավոր կդարձնի տարադրամի իրական արժեւորումը:
Միջազգային գործարար զեկույցի համաձայն, ուսումնասիրված 34
երկրների մեծ մասում մասնավոր հատվածի ձեռնարկությունները
լավատեսորեն են տրամադրված տարվա հեռանկարների նկատմամբ: Արդեն
հինգերորդ տարին է, ինչ Հնդկաստանը գլխավորում է աղյուսակը որպես
ամենալավատես տնտեսություն ունեցող, իսկ Ճապոնիան կրկին աղյուսակի
ամենաստորին մասում է` հոռետեսության արդյունքով: Հայաստանի
մասնավոր հատվածի ձեռնարկությունները 2008թ.-ի արդյունքների
նկատմամբ ավելի լավատես են եղել, քան նախորդ տարի:
Շահութաբերության առնչությամբ լավատեսության մակարդակը գերազանցել
է համաշխարհային միջինը, իսկ արտահանման վերաբերյալ լավատեսության
մակարդակը աննշան է ցածր համաշխարհային միջինից: Զբաղվածության
իրական աճի ցուցանիշը Հայաստանում ավելի ցածր է եղել, քան
կանխատեսվել էր 2007թ.-ին:
Միջազգային ներդրումների համար որոշիչ գործոնների
կարեւորության մասով Հայաստանի, ինչպես նաեւ համաշխարհային
գործարարության համար ամենակարեւորը տնտեսության չափն ու զարգացման
ներուժն են: Արտահանող ձեռնարկությունների թիվը Հայաստանում (34%)
զիջում է համաշխարհային միջինին (39%) եւ 2007թ.-ին գրանցված
36%-ին: Հայաստանի ձեռնարկությունների 72%-ը ներկրում է`
գերազանցելով համաշխարհային միջին 39% ցուցանիշը: Հայ գործարարների
երկու երրորդն իրենց մրցակիցներին տեսնում են տեղական շուկայում:
Այս ցուցանիշը գրեթե կրկնակի ավելի է համաշխարհային միջինից:
Հայաստանի մասնավոր հատվածի ձեռնարկությունները (83%),
համաշխարհային գործարարները (70%) իրենց ամենամեծ մրցակցային
առավելությունը տեսնում են ապրանքի եւ ծառայության որակի մեջ:
Հայաստանում մարդկային ռեսուրսները եւ հմուտ աշխատուժը որպես
գլխավոր մրցակցային առավելություն է դիտում ձեռնարկությունների
75%-ը,` ի տարբերություն համաշխարհային 55% ցուցանիշի:
Նշենք, որ հարցումն անցկացվում է «Գրանթ Թորնթոն» ընկերության
տարբեր երկրների ներկայացուցչությունների կողմից:
Կազմակերպությունը գործում է 100-ից ավելի երկրներում: Տարեցտարի
ավելի մեծ թվով երկրներ են ընդգրկվում հարցումների ցուցակում:
Հայաստանն ուսումնասիրություններին մասնակցում է երրորդ տարին: