ԱԿՆԿԱԼՒՈՒՄ Է, ՈՐ ԱՅՍ ՏԱՐԻ ԵՎՍ ՀԱՅԱՍՏԱՆԸ ԿՈՒՆԵՆԱՅ ՀՆԱ-Ի
ԵՐԿՆԻՇ ԱՃ
08-10-2008 22:00:00 | Հայաստան | Տնտեսութիւն
ԵՐԵՎԱՆ, 8 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Ակնկալւում է, որ այս
տարի եւս Հայաստանը կունենայ ՀՆԱ-ի երկնիշ աճ` շինարարութեան
բնագաւառում բուռն ակտիւութեան շնորհիւ: Այս մասին նշւում է «Գրանթ
թորնթոն» ընկերութեան հրապարակած 2008թ-ի միջազգային գործարար
զեկոյցի Հայաստանին վերաբերող յատուածում, որը հոկտեմբերի 8-ին
ներկայացրեց ընկերութեան Հայաստանի ներկայացուցիչ Գուրգէն
Յակոբեանը:
Զեկոյցի համաձայն, սննդամթերքի ներկրման, նաւթի միջազգային
բարձր գների, նաեւ ներքին մեծ պահանջարկի վրայ հիմնուելով կարելի է
ակնկալել, որ տարուայ վերջին սպառողական գների ինդեքսի աճը կկազմի
մօտ 7%` գերազանցելով գնաճի յայտարարուած 4%-ը: Այդուհանդերձ, ըստ
Գ.Յակոբեանի, այս ցուցանիշն աւելի ցածր է, քան հարեւան երկրներինը,
եւ ակնկալւում է, որ 2009թ.-ին այն կնուազի` հայտնվելով յայտարարուած
սահմանում: Նշուեց, որ այս տարի բիւջէն կունենայ ՀՆԱ-ի 1,2%-ի չափով
պակասուրդ, որը հնարաւոր կդարձնի տարադրամի իրական արժեւորումը:
Միջազգային գործարար զեկոյցի համաձայն, ուսումնասիրուած 34
երկրների մեծ մասում մասնաւոր հատուածի ձեռնարկութիւնները
լաւատեսօրէն են տրամադրուած տարուայ հեռանկարների նկատմամբ: Արդէն
հինգերորդ տարին է, ինչ Հնդկաստանը գլխաւորում է աղիւսակը որպէս
ամենալավատես տնտեսութիւն ունեցող, իսկ Ճապոնիան կրկին աղիւսակի
ամենաստորին մասում է` յոռետեսութեան արդիւնքով: Հայաստանի
մասնաւոր հատուածի ձեռնարկութիւնները 2008թ.-ի արդիւնքների
նկատմամբ աւելի լաւատես են եղել, քան նախորդ տարի:
Շահութաբերութեան առնչութեամբ լաւատեսութեան մակարդակը գերազանցել
է համաշխարհային միջինը, իսկ արտահանման վերաբերեալ լաւատեսութեան
մակարդակը աննշան է ցածր համաշխարհային միջինից: Զբաղվածության
իրական աճի ցուցանիշը Հայաստանում աւելի ցածր է եղել, քան
կանխատեսվել էր 2007թ.-ին:
Միջազգային ներդրումների համար որոշիչ գործօնների
կարեւորութեան մասով Հայաստանի, ինչպէս նաեւ համաշխարհային
գործարարութեան համար ամենակարեւորը տնտեսութեան չափն ու զարգացման
ներուժն են: Արտահանող ձեռնարկութիւնների թիւը Հայաստանում (34%)
զիջում է համաշխարհային միջինին (39%) եւ 2007թ.-ին գրանցուած
36%-ին: Հայաստանի ձեռնարկութիւնների 72%-ը ներկրում է`
գերազանցելով համաշխարհային միջին 39% ցուցանիշը: Հայ գործարարների
երկու երրորդն իրենց մրցակիցներին տեսնում են տեղական շուկայում:
Այս ցուցանիշը գրեթէ կրկնակի աւելի է համաշխարհային միջինից:
Հայաստանի մասնաւոր հատուածի ձեռնարկութիւնները (83%),
համաշխարհային գործարարները (70%) իրենց ամենամեծ մրցակցային
առաւելութիւնը տեսնում են ապրանքի եւ ծառայութեան որակի մէջ:
Հայաստանում մարդկային ռեսուրսները եւ հմուտ աշխատուժը որպէս
գլխաւոր մրցակցային առաւելութիւն է դիտում ձեռնարկութիւնների
75%-ը,` ի տարբերութիւն համաշխարհային 55% ցուցանիշի:
Նշենք, որ հարցումն անցկացւում է «Գրանթ Թորնթոն» ընկերութեան
տարբեր երկրների ներկայացուցչությունների կողմից:
Կազմակերպութիւնը գործում է 100-ից աւելի երկրներում: Տարէցտարի
աւելի մեծ թւով երկրներ են ընդգրկվում հարցումների ցուցակում:
Հայաստանն ուսումնասիրություններին մասնակցում է երրորդ տարին: