ՀԱՅԱՍՏԱՆՈՒՄ ՏՆՏԵՍԱԿԱՆ ՊՐՈԲԼԵՄՆԵՐ ԿԱՌԱՋԱՆԱՆ ՈՉ ՄԻԱՅՆ ԱՐՏԱՔԻՆ
ԱԶԴԱԿՆԵՐԻ, ԱՅԼԵՎ ՀՀ ԻՇԽԱՆՈՒԹՅՈՒՆՆԵՐԻ ՎԱՐԱԾ ՔԱՂԱՔԱԿԱՆՈՒԹՅԱՆ
ՊԱՏՃԱՌՈՎ,- ԳՏՆՈՒՄ Է ՏՆՏԵՍԱԳԵՏ ԱՆԴՐԱՆԻԿ ԹԵՎԱՆՅԱՆԸ
ՀԱՅԱՍՏԱՆՈՒՄ ՏՆՏԵՍԱԿԱՆ ՊՐՈԲԼԵՄՆԵՐ ԿԱՌԱՋԱՆԱՆ ՈՉ ՄԻԱՅՆ ԱՐՏԱՔԻՆ
ԱԶԴԱԿՆԵՐԻ, ԱՅԼԵՎ ՀՀ ԻՇԽԱՆՈՒԹՅՈՒՆՆԵՐԻ ՎԱՐԱԾ ՔԱՂԱՔԱԿԱՆՈՒԹՅԱՆ
ՊԱՏՃԱՌՈՎ,- ԳՏՆՈՒՄ Է ՏՆՏԵՍԱԳԵՏ ԱՆԴՐԱՆԻԿ ԹԵՎԱՆՅԱՆԸ
01-10-2008 20:00:00 | Հայաստան | Տնտեսություն
ԵՐԵՎԱՆ, 1 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Միջազգային ֆինանսական
շուկայի ճգնաժամը դեռեւս չի ազդում Հայաստանի տնտեսության վրա, եւ
դրա պատճառն այն է, որ Հայաստանի տնտեսությունը ինտեգրված չէ
միջազգային շուկայում: Նման կարծիք հոկտեմբերի 1-ի ասուլիսում
հայտնեց տնտեսագետ Անդրանիկ Թեւանյանը: Ըստ նրա, այդ ճգնաժամի
ազդեցությունը Հայաստանի տնտեսության վրա կլինի անուղղակի.
կկրճատվեն մասնավոր տրանսֆերտների չափը (քանի որ արտերկրում ապրող
հայերը բնականաբար զգալու են դրա ազդեցությունը): Իսկ մասնավոր
տրանսֆերտները, Ա.Թեւանյանի գնահատմամբ, շատ մեծ նշանակություն
ունեն Հայաստանի համար: «Դա պետական բյուջեի ծախսայինի չափով
գումար է. 2007թ.-ին այն կազմել է մոտ 2 մլրդ դոլար: Դրանք այն
գումարներն են, որոնք մտնում են սպառողական շուկա եւ նպաստում են
երկրի տնտեսության աշխուժացմանը»,- ասաց տնտեսագետը, հավելելով,
որ, եթե այսպես շարունակվի, ապա 2009թ.-ի առաջին եռամսյակից հետո
Հայաստանում կսկսվի տնտեսության ետընթացը:
Ա.Թեւանյանի համոզմամբ, Հայաստանում տնտեսական պրոբլեմներ
կառաջանան ոչ միայն արտաքին ազդակների պատճառով, այլ նաեւ ՀՀ
իշխանությունների վարած քաղաքականության: «Հարկային տեռոր է
իրականացվում բիզնեսի տարբեր շերտերի նկատմամբ: Եթե տնտեսության
կառուցվածքը չի փոխվում, մրցակցային պայմանները չեն բարելավվում,
ապա հարկային մամլիչը գների աճի կբերի»,- գտնում է տնտեսագետը: Նրա
խոսքերով, գումարներ են հավաքում բյուջեն լցնելու նպատակով,
մինչդեռ բյուջեն չի կարող նպատակ լինել, այլ այն հետեւանք է
տնտեսական ընդհանուր իրավիճակի: «Հայաստանը դարձել է թոշակառու
պետություն: Գումարներ են հավաքում, բարձրացնում են թոշակները,
այնինչ գների աճը առաջին հերթին հենց թոշակառուների վրա է
ազդում»,- ասաց Ա.Թեւանյանը: