ՀԱՅԱՍՏԱՆՆ ԸՆԴԳՐԿՎԵԼ Է FAO-Ի ՊԱՐԵՆԻ ԿՏՐՈՒԿ ԳՆԱՃԻ ԴԵՄ ՈՒՂՂՎԱԾ
ՆԱԽԱՁԵՌՆՈՒԹՅՈՒՆՈՒՄ
17-07-2008 16:50:00 | Հայաստան | Տնտեսություն
ԵՐԵՎԱՆ, 17 ՀՈՒԼԻՍԻ, ՆՈՅՅԱՆ ՏԱՊԱՆ: Պարենի ու
գյուղատնտեսության կազմակերպությունը (FAO) օրերս հաստատել է 21
մլն ԱՄՆ դոլար ընդհանուր արժողությամբ մի ամբողջ շարք ծրագրեր` 48
երկրներում օգնելու փոքր ֆերմերներին եւ խոցելի տնային
տնտեսություններին մեղմել պարենի եւ գյուղատնտեսական ապրանքների
աճող գների բացասական հետեւանքները: Ծրագրերը ֆինանսավորվում են
Փորձագիտական օժանդակության ծրագրի շրջանակներում, այսինքն` FAO-ի
սեփական միջոցներով, եւ մաս են կազմում Պարենի կտրուկ գնաճի դեմ
ուղղված նախաձեռնության:
Ինչպես «ՆՈՅՅԱՆ ՏԱՊԱՆ»-ին հայտնեցին FAO-ից, Հայաստանը նշված
երկրների թվում է եւ կօգտվի այս նախաձեռնությունից նորահաստատ
«TCP/ARM/3202 (E) - Գյուղատնտեսական ապրանքների մատակարարում
խոցելի բնակչությանը պարենի կտրուկ գնաճի դեմ ուղղված
նախաձեռնության սահմաններում» ծրագրի շրջանակներում: Ծրագրի
ընդհանուր նպատակը Հայաստանի պարենի առումով անապահով շրջաններում
ամենից խոցելի տնային տնտեսությունների ապրուստի եւ պարենային
ապահովության պահպանումն է: Այս շրջանները տուժել են 2007/08 դաժան
ձմեռվանից, ինչպես նաեւ պարենի կտրուկ գնաճի վերջերս ծագած
ճգնաժամից: Ծրագիրը նպատակ ունի նաեւ տրամադրել փորձագիտական
օժանդակություն ֆերմերային լավագույն գործելակերպերի վերաբերյալ եւ
ապահովել երկարատեւ եւ կայուն արդյունքներ ցանքսի ապագա սեզոնների
համար:
Այս ծրագիրը կհասցեագրվի ամենից շատ տուժած գյուղացիական
տնտեսություններին` հացահատիկի սերմացուի եւ համարժեք
պարարտանյութերի անհետաձգելի բաշխմամբ: Սա ֆերմերներին
հնարավորություն կընձեռի վերսկսել գյուղատնտեսական աշխատանքները,
ինչպես նաեւ նրանց կառաջարկի եկամտի այլընտրանքային աղբյուր`
այդպիսով վերականգնելով տնային տնտեսությունը եւ երաշխավորելով
պարենային ապահովությունը: Այս ամսվանից սկսած ֆերմերներին
կտրամադրվեն գյուղատնտեսական ապրանքներ: Բացի այդ, հասցեագրված
շահառուների համար կկազմակերպվեն դասընթացներ կարտոֆիլի, ցորենի եւ
բանջարեղենի արտադրության վերաբերյալ: Ծրագրից կօգտվեն մոտավորապես
2000 խոցելի գյուղական տնային տնտեսություններ Հայաստանի ամենից
տուժած շրջաններում:
Ծրագրի տեւողությունը 12 ամիս է, ընդհանուր բյուջեն` 500
հազար ԱՄՆ դոլար: Ծրագիրն արդեն մտել է գործողության մեջ:
Հայաստանում FAO-ի ներկայացուցչության ծրագրի իրականացման
գործընկերը ՀՀ Գյուղատնտեսության նախարարությունն է: