Ամփոփվել են ԼՂՀ-ի արտաքին գործերի նախարարության 2009թ.-ի գործունեության արդյունքները
13-03-2010 20:00:00 | Հայաստան | Քաղաքական
ՍՏԵՓԱՆԱԿԵՐՏ, 13 ՄԱՐՏԻ, ՆՈՅՅԱՆ ՏԱՊԱՆ: Արցախի Հանրապետության Նախագահ Բակո Սահակյանի մոտ մարտի 13-ին տեղի է ունեցել աշխատանքային խորհրդակցություն` նվիրված հանրապետության արտաքին գործերի նախարարության 2009 թվականի գործունեության արդյունքների ամփոփմանը եւ 2010 թվականի անելիքներին: Զեկույցներով հանդես են եկել ԼՂՀ արտգործնախարար Գեորգի Պետրոսյանը, արտերկրում Արցախի Հանրապետության մշտական ներկայացուցչությունների ղեկավարները:
Ըստ ԼՂՀ Նախագահի աշխատակազմի տեղեկատվության գլխավոր վարչության հաղորդագրության, Նախագահն անդրադարձել է երկրի արտաքին քաղաքականության հայեցակարգին եւ ԱԳՆ կենտրոնական ապարատի ու ներկայացուցչությունների աշխատանքին: Նա ընդգծել է, որ Արցախի Հանրապետության արտաքին քաղաքականության հիմքում ընկած են հավասարակշռվածության եւ բազմաուղղվածության սկզբունքները, ինչը պայմանավորված է ինչպես տարածաշրջանի յուրահատկությամբ, այնպես էլ Սփյուռքի առկայությամբ:
Բ.Սահակյանը բանակցային գործընթացի լիարժեք ձեւաչափի վերականգնումը, Արցախի` որպես բանակցային լիիրավ կողմի մասնակցությամբ, համարել է հակամարտության կարգավորման առանցքային բաղադրամասերից մեկը:
Նախագահը կոնկրետ հանձնարարականներ է տվել արտաքին գործերի նախարարությանը եւ արտերկրում ԼՂՀ-ի դիվանագիտական առաքելությունների պատասխանատուներին` գերատեսչության առջեւ ծառացած խնդիրներն արդյունավետ կերպով լուծելու համար: