«ԵՐԵՎԱՆ ՋՈՒՐ»-Ը ԱՊՐԻԼԻ 1-4-ԻՆ ԿՁԵՌՆԱՐԿԻ ԼԱՅՆԱԾԱՎԱԼ
ԳՈՐԾՈՂՈՒԹՅՈՒՆՆԵՐ ԱՊՕՐԻՆԻ ՄԻԱՑՈՒՄՆԵՐԻ ՎԵՐՋՆԱԿԱՆ ԱՊԱՄՈՆՏԱԺՄԱՆ
ՈՒՂՂՈՒԹՅԱՄԲ
26-03-2008 22:00:00 | Հայաստան | Տնտեսություն
ԵՐԵՎԱՆ, 26 ՄԱՐՏԻ, ՆՈՅՅԱՆ ՏԱՊԱՆ: «Երեւան ջուր» ընկերությունը
որոշել է ապրիլի 1-4-ին ձեռնարկել լայնածավալ գործողություններ
ապօրինի միացումների վերջնական ապամոնտաժման ուղղությամբ: Ըստ
«ՆՈՅՅԱՆ ՏԱՊԱՆ»-ին տրամադրած հաղորդագրության, Երեւանի հարավային
եւ արեւմտյան հատվածներում ջրամատակարարման բարելավմանն ուղղված
աշխատանքներում «Երեւան ջուր»-ը հանդիպում է մի շարք խնդիրների:
Այս հատվածները, ի թիվս այլ աղբյուրների, մատակարարվում են
«Արարատյան» պոմպակայանի թիվ 4 եւ 5, ինչպես նաեւ թիվ 1 եւ 2 մայր
ջրատարներից: Այս ջրատարների վրա, պոմպակայանի եւ քաղաքի միջեւ
ընկած հատվածում ընկերությունը հայտնաբերել է ապօրինի միացումներ,
որտեղից կատարվող ջրառի ծավալները զգալիորեն աճել են
2006-2008թթ.-ին: Մասնավորապես, 2006թ.-ին 4 ու 5 ջրատարներից
ապօրինի ջրառը կազմել է 300 լ/վրկ, որը տարեկան կազմում է 9 մլն
խմ: 2007թ.-ին ջրառի ծավալը հասել է 400 լ/վրկ, կամ 12,5 մլն խմ-ի,
իսկ 2008թ.-ին փետրվարին` արդեն 500 լ/վրկ-ի:
Ներկայումս «Երեւան ջուր»-ը հայտնաբերել է 24 ապօրինի միացում
ընդհանուր 270 լ/վրկ ծավալով, մինչդեռ լրացուցիչ 250 լ/վրկ ծավալի
առկայության դեպքում հնարավոր կլիներ 3-4 ժամով երկարացնել քաղաքի
հարավային եւ արեւմտյան հատվածների բնակչության ջրամատակարարումը:
Ըստ հաղորդագրության, ապօրինի միացումների ապամոնտաժման
ընկերության բազմաթիվ փորձերն ունեցել են տարբեր արդյունքեր.
ապամոնտաժման աշխատանքներից 2-3 օր անց, նույն տեղերում կրկին
կատարվել են միացումներ կամ աշխատանքային թիմերին պարզապես
ֆիզիկապես թույլ չեն տվել գործել: Այդ ապամոնտաժման աշխատանքների
ժամանակ ջրմուղի աշխատակիցները հանդիպել են տեղի բնակչության
դիմակայությանը: