ԼՈՌՈՒ ԵՎ ՇԻՐԱԿԻ ՄԱՐԶԵՐՈՒՄ ՄԱՐՏԻ 1-Ի ԴՐՈՒԹՅԱՄԲ ԱՆՕԹԵՎԱՆ Է 7
665 ԸՆՏԱՆԻՔ
10-03-2008 17:00:00 | Հայաստան | Հասարակություն
ԵՐԵՎԱՆ, 10 ՄԱՐՏԻ, ՆՈՅՅԱՆ ՏԱՊԱՆ: Լոռու եւ Շիրակի մարզերում
մարտի 1-ի դրությամբ անօթեւան է 7 665 ընտանիք: Դրանցից 4 666-ը`
ՀՀ Շիրակի մարզում (այդ թվում` Գյումրիում` 4018, մարզի 41
գյուղական համայնքներում` 648 ընտանիք): Ըստ ՀՀ Տարածքային
կառավարման նախարարության հասարակայնության հետ կապերի բաժնի
հաղորդագրության, այս մասին հայտարարվել է ՀՀ փոխվարչապետ,
տարածքային կառավարման նախարար Հովիկ Աբրահամյանի մոտ մարտի 10-ին
հրավիրված աշխատանքային խորհրդակցության ժամանակ:
1988-2008թթ.-ի ընթացքում Շիրակի մարզի քաղաքային եւ
գյուղական համայնքներում բնակարաններով ապահովվել են 19 265
անօթեւան ընտանիքներ, այդ թվում 17 779-ը` Գյումրիում: Բացի այդ,
Բնակարանների գնման ծրագրով (ԲԳՎ) 2005-2007թթ.-ին Գյումրիում
բնակարաններ է ստացել 520 շահառու ընտանիք, մարզի գյուղական
բնակավայրերում կառուցվել է 112 բնակելի տուն: Բնակարանային
ապահովման ծրագրեր են իրականացվել նաեւ հասարակական կառույցների
կողմից: Մասնավորապես, «Ուրբան» հիմնադրամի միջոցներով
2000-2004թթ.-ին մարզում բնակարան է ձեռք բերել 4 838 ընտանիք:
Լոռու մարզում 2008թ.-ի մարտի 1-ի դրությամբ հաշվառվել է 2
999 անօթեւան ընտանիք, որից 114-ը` Վանաձոր, 923-ը` Սպիտակ, 59-ը`
Ստեփանավան քաղաքներում: Մարզի 33 գյուղերում անօթեւան է 1 903
ընտանիք: 1988-2008թթ.-ի ընթացքում մարզում բնակարանով ապահովվել է
14 601 անօթեւան ընտանիք, որից 11083 ընտանիք Վանաձոր, Սպիտակ,
Ստեփանավան քաղաքներում, 3 518-ը` գյուղերում: Ինչպես Շիրակի
մարզում, Լոռիում նույնպես իրականացվել են բնակարանային ապահովման
ծրագրեր. 2005-2007թթ.-ին Լոռու մարզում ԲԳՎ ծրագրով բնակարան է
ստացել 179 ընտանիք, իսկ գյուղերում 432 ընտանիքի համար կառուցվել
են բնակելի տներ: